Une biele rispueste di popul: tante e je la int che e je seneose di jentrâ te storie. La campagne di adesion pe leture de Bibie par furlan e je partide in maniere positive e si è za a bon pont. Al reste inmò cualchi puest a disposizion par jentrâ te storie, grazie a chest event unic.
Par rimarcâ ancjemò di plui la atenzion su la iniziative e sul puest sede de leture continue, a son stadis pensadis 2 seradis “colaterâls” al event di Avrîl.
DÔS CONFERENCIS_ Il prin incuintri, curât de Associazion Culturâl Glesie Furlane, si è davuelt joibe ai 3 di Març aes 20.30 li de Glesie de Puritât (Udin, dongje dal Domo) e al jere “La Bibie par un Popul”, li che a son intervignûts i protagoniscj de preparazion e de aprovazion dal test voltât:
• bonsignôr Duilio Corgnali, tal 1977 vicjari episcopâl pe culture de Arcidiocesi di Udin e coordenadôr de Comission interdiocesane dai bibliscj e teolics pe preparazion de Bibie. Al è stât il protagonist dal ricognossiment uficiâl;
• pre Romano Michelotti e pre Antonio Cappellari, components de comission e amîs personâi dal tradutôr Pre Antonio Bellina.
Chel altri incuintri, “Un Popul cu la sô Bibie”, par cure dal diretôr artistic dal event, Federico Rossi, al è previodût par joibe ai 17 di Març aes 20.30, simpri li de Glesie de Puritât, e al varà come argoment la impuartance de dimension antropologjiche e de identitât culturâl tal orizont universalistic de Bibie. A intervignaran:
• Monsignôr Rinaldo Fabris, docent di esegesi bibliche e President de Associazion Bibliche Taliane;
• Prof. Franco Fabbro, neuropsicolic e docent di neuropsichiatrie infantîl ae Universitât dal Friûl.
L’INCUINTRI CUL ARCIVESCUL_ Infin, al è previodût par sabide ai 26 di Març aes 15.30 te Catedrâl di Udin, l’incuintri spirituâl cul Arcivescul di Udin, Mons. Andrea Bruno Mazzocato, e i letôrs-volontaris. E sarà la ocasion par ringraziâju de lôr disponibilitât e sotliniâ la impuartance de lôr azion a servizi de proclamazion de peraule di Diu.

Redazion