CULTURE – ART-Â. Indevant i zovins artiscj furlans

Cualis ocasions àno i artiscj zovins di fâsi cognossi in Friûl? Cualis oportunitâts àno di dialogâ e di inserîsi tal dibatit culturâl? No tantis a sintî Paolo Toffolutti, curadôr dal progjet “Ma dîstu a mi? – Spazis publics art contemporanie Friûl-Vignesie Julie”, pensât di Neo associazion culturâl e che al tocjarà lengaçs artistics diferents (de piture ae fotografie, dai fumets ae videoart, ae sculture). Obietîf dal progjet al è propit chel di condusi artiscj, ma ancje critics, adets ai lavôrs e public, intun percors che al puartarà a judâ e a stiçâ la art zovine furlane o fate di zovins che a stan in Friûl, ma ancje chê fate di cui che nol è plui zovin, ma nol à vût la oportunitât di fâ madurî il so percors. In ce maniere? Metint in pîts contescj e ativitâts di espression e confront.
A judicâ dal alt numar di adesions al progjet, che al è articolât in plui pas, la gnove iniziative e rispuint a une necessitât. Une otantine i artiscj dai 16 ai 35 agns che a àn cjapât contat cun Toffolutti e che a cjapin part ae mostre vierte fin ai 25 di Fevrâr tal centri storic di Udin. Buteghis, studis e uficis a dan acet aes lôr oparis: un banc di prove par verificâ la eficacie dal lavôr e misurâsi cul public. Il progjet al è, di fat, une spassizade lungje un an che e puartarà a fâ un censiment, trê mostris, un bant di concors pe creazion di oparis origjinâls, doi ciclis di conferencis. Il dut tacant di une batude di Robert De Niro in “Taxi driver” e cjapant la imagjin dal alfabet di gescj esprimûts des mans fotografadis di Giulia Pittoni.
“E je une anomalie in Friûl-Vignesie Julie – e marche Toffolutti –. No son o no àn vût ocasions impuartantis par presentâ la lôr opare ni artiscj zovanissims ni artiscj plui grancj, che, duncje, a cirin la atenzion che a mertin fûr de regjon. Al è un probleme di “apartheid”, di segregazion culturâl, che nol ven frontât ni dai organizadôrs culturâls ni des istituzions”. Di cheste cussience e nas il progjet “Ma dîstu a mi?”, sostignût dai Comuns di Udin e di Buri e de Regjon, cul contribût di diviers sponsor tecnics. Tra i prossims pas (dai 19 di Març), la mostre di vot artiscj che a lavorin in Friûl, che e sarà prontade a Buri, te vile di Toppo Florio, sede storiche dal Spac, nassût tal 2006 tant che Spazi pe art contemporanie e deventât Spazi public art contemporanie cuntun svilup sul teritori furlan.
Par stâ daûr al progjet, “in progress”, si pues visitâ il sît www.spac.fvg.it
Erika Adami