ATUALITÂT – La ocasion pierdude

La ocasion storiche par che l’autonomisim al deventàs une prassi politiche inlidrisade in profonditât e in maniere permanente sul teritori de Patrie dal Friûl i Furlans le àn vude.
PASSE 30 AGNS DI PRESINCE_ Dal 1966 fint ai agns 90 a àn vude la disponibilitât di un partît autonomist compagn che in Sud Tirôl e in Val di Aoste, il Moviment Friûl, ma no’ndi àn aprofitât. No i àn dât plui dal 5-6% di fuarce eletorâl in medie regjonâl, ancje se si capive une vore ben che il potenziâl di consens sui siei programs al jere une vore plui larc di chê percentuâl, tant al è vêr che al rivave a meti in moviment une vore di int su obietîfs particolârs e impuartants, e chei altris partîts si sintivin condizionâts par la pôre che a vevin di pierdi eletorât di simpatie autonomiste. Dut câs, cun chel puar 5-6%, inte ete di Gladio, l’MF par un cuart di secul al à tignude une mobilitazion autonomiste organizade e continue in Friûl, sul teritori e tes istituzions, fasint risultâts storics impuartants, che plui tart a voltis si son atribuîts altris, o a altris. Al jere nassût di un moviment partît de societât furlane, e al contave suntun orientament autonomist de societât stesse une vore larc, plui dal consens eletorâl che al riceveve, che lu seguive cun atenzion.
CE RESTIAL VUÊ?_ Ma cumò, tal 2011, esistie une fuarce autonomiste organizade? e esistie te societât furlane une culture autonomiste cu la disponibilitât politiche e esprimisi come tâl? Il Moviment Friûl vuê al è une memorie, che le custodissin e le vuardiin une part di chei che lu àn vuidât dai agns 60 a cuant che al è stât decretât il so ritîr tai agns 90. Chê memorie e dîs che une fuarce autonomiste organizade cumò no esist, ma salacor no esistin plui nancje chê disponibilitât e chê culture autonomiste te societât furlane che une volte e deve dome il 5-6% al partît autonomist, che e tignive il rest par chei altris partîts, ma che su obietîfs impuartants e particolârs, come par esempli la istituzion de universitât furlane, il ricognossiment istituzionâl de lenghe, i criteris de ricostruzion dopo dal taramot, e seguive l’MF. Se e esistès, no assistarès cence reazion di place aes tentazions di une retore Compagno e di une classe politiche che e à rineade la identitât furlane, di cedi un toc a la volte la Universitât dal Friûl a chê di Triest, e tornâ aes cundizion di prin dal taramot, li che la massonarie de unitât regjonâl le à simpri volude, anulant lis lotis di une gjenerazion di furlans per vêle, e vêle autonome. O ancje, e varès manifestât cun fuarce pôcs agns fa cuintri di un rifasiment dal statût de regjon che al ignore la identitât teritoriâl e linguistiche dal Friûl. La comunitât furlane e je sbregade, dissociade, stranide, e je daûr a pierdi la identitât plui profonde parie cu la lenghe. Chel pôc di orgoi di se che e à vût, che al varès vût di esprimisi in forme politiche e autonomiste, lu à savût esprimi dantji dome un 5-6% di pês politic al Moviment Friûl, e jal à gjavât in part ae fin dai agns 80. Tancj si son declarâts autonomiscj cui agns 90, parcè che dopo dal ritîr dal MF a pensavin che al restàs par lôr un spazi politic di jemplâ, ma no lu àn mai savût sostituî, e par cualchidun la autonomie si è identificade e esauride cu la fortune politiche de sô persone. Lis cundizions sociâls dal Friûl cumò no son chês dal 1966. L’autonomisim nol varès bisugne cumò di pretindi il svilup di une tiere di emigrazion, bandonade de politiche e destinade aes casermis de Vuere Frede.
CE CHE AL COVENTARÈS_ Autonomisim vuê al varès ancjemò une reson di sei par esprimi chês bisugnis di une comunitât teritoriâl che a corin risi di sei trascuradis tant plui fuarte che e je la maree de globalizazion. La politiche autonomiste di une comunitât le pues garantî inte sô espression plui complete dome une organizazion autonome e autonomiste come che al jere l’MF, espression des bisugnis di chê comunitât, riferide dome a chel teritori. Intun sisteme di teritoris e stâts interdipendents, plui un popul al è cussient de sô identitât storiche, nazionâl e linguistiche, e le manifeste intun partît di autonomie, plui al conte e si difint dal sfrutament, de emargjinazion e de disgregazion. Ma i Furlans a àn acetade la distruzion di chest e di chê, par cori daûr, ancje pe politiche di cjase lôr, come che a àn fat simpri, a identitâts che no son la lôr, e a partîts che no son furlans.
Marco De Agostini, segretari politic dal MF