Sfuei Mensîl Furlan Indipendent
Archivi de Patrie

IL FERÂL. Impuartance de culture

pre Antoni Beline
pre Antoni Beline

Ancje se tai secui la glesie e je stade la prime, e tantis voltis la uniche, a vierzi scuelis e universitâts, une des acusis plui frecuentis e je che glesie e culture, teologjie e filosofie, religjon e reson a son inconciliabilis. Di li la reazion dal Umanesim e dal Rinassiment che al à vude la sô esplosion tal inluminisim o secui dai lums…
Al è vêr che la glesie e à promovude la culture ma al è vêr ancje che la glesie e à viodude la culture come la cause principâl che la int e à pierdude la fede e dismenteade la puarte de glesie.
La cuistion e je contraditorie dome in façade. Se si va in sot si viôt che pe glesie la culture e jere dome chê gleseastiche e teologjiche o che e veve di servî la teologjie. Tune vision unitarie (che mi plâs) e totalitarie (che no mi plâs), la ponte plui alte di dutis e veve di jessi chê dal cjampanili e nissune no veve di dâi ombre. Se i risultâts de sience no si cumbinavin cun chei de rivelazion e de Bibie, a vevin reson la Bibie e il magjisteri e tuart la reson. Emblematic al è il câs di Galileo. No parcè che lu àn condanât ma parcè che a jerin convints di jessi in reson…
I plui furbos e chei che si sintivin vonde autosuficients a son scjampâts, pierdint ce che di bon la religjon e podeve dâur a la lôr anime, e i plui stupits e puars e debui e sfurtunâts a son restâts, pierdint ogni autonomie e ogni gust di ribaltâ un mont mâl fat e di vierzi gnovis stradis a la cognossince…
La glesie e pues vantâ benemerencis, e tantis, ma la benemerence plui grande e je chê di judâ la int a no vê plui dibisugne di chei altris…
Strani che un om come don Milani, che al bat di un continui sul primât de gracie e dai sacraments e che al met in prin plan la dimension spirtuâl de glesie e dal Vanzeli, al vedi insistût su la impuartance de culture cuntune fuarce che nancje i inteletuâi e i inluminiscj no le àn vude. Lui al partive dal fat che un om cence culture no si pues nancje definîlu om. Al sarà simpri un puar sclâf. O dai siôrs o di se. Dome cu la culture al rivarà al scjalin di om. Di li indenant e scatarà la gracie…
PRE ANTONI BELINE
Gjavât di Trilogjie tormentade pagj. 68ss

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +