TERITORIS – AUSTRIE. Gnûfs sucès pe drete populiste di strache

La Viene par solit rosse e piert colôr, e si colore simpri plui cul blu de drete nazionâl-popolâr di Strache, che tignint cont dai ultins sucès si cjate sul troi fat agns indaûr di Haider. Anzit: il partît blu al domande cumò di partecipâ al futûr guvier.
I sociâldemocratics di Michael Haeupl, sindic dal 1994, a àn ricevût il 44,5 par cent (-4,5 par cent) dai vôts, pierdint la maiorance assolude; il partît nazionâl de Libertât Fpoe di Heinz-Christian Strache al è invezit montât sù al 26,2 par cent vuadagnant l’11,4 par cent a pet dal esit dal 2005. I conservadôrs dal Oevp, partît al guvier cu la Spoe, al è lât di rive jù cuntun mancul 4,9 par cent tocjant il 13,8.
Lavorant a Viene o ai vût la oportunitât di gjoldi ogni dì dai poster de campagne eletorâl. Ducj i cuatri partîts Spoe, Oevp, Verts e Fpoe a son stâts une vore presints: i plui visibii a jerin chei de Fpoe, simpri cul leader Strache zovin, moderni e cu la bocje di ridi, fotografât cu la int semplice o cuntun rapresentant des fuarcis dal ordin e simpri cun messaçs curts e clârs: par esempli, Weil ICH an EUCH glaube (vâl a dî: Parcè che JO o crôt in VOALTRIS).
Secont il segretari gjenerâl Kickl, il slogan principâl dal partît al puarte une strente relazion tra il leader Strache e i vienês, mostrantlu tant che il leader che al difint il so popul. Il so sproc plui discutût al è stât a pro de sigurece e de difese de «vere Viene» cuintri la islamizazion: Mehr Mut für unser ‘Wiener Blut’. Und: Zu viel Fremdes tut niemandem gut. Voltât al devente: Coragjo pal nestri «sanc vienês». E: Masse element forest nol fâs ben a dinissun.
La recipe di Strache e à cjatât spazi tai cuartîrs cuntune alte imigrazion: il so grant sucès al è che Strache al è cussì rivât a pâr cul massim risultât dal partît Fpoe sot Haider. In struc si pues dî che o vin ancje a Viene, come tal resint sucès dai popoliscj tes elezions te Stirie «rosse», une tindince che si cjate ancje in Svuizare e in Gjermanie e che e puarte viers sieltis politichis une vore claris tal timp de crisi economiche.
Ianez Erat