ATUALITÂT – Fusilâts dôs voltis

Prin di Lui dal 1916: dongje dal cimitieri di Çurçuvint a vegnin fusilâts cuatri alpins de 109esime compagnie dal bataion alpin «Monte Arvenis». A son Silvio Gaetano Ortis di Paluce, Basilio Matiz di Tamau, Giovanni Battista Coradazzi di Fors Disore e Angelo Massaro di Manià. I cuatri, par no vê ubidît a un ordin sbaliât dât di un comandant incompetent (Cjapitani Armando Ciofi) a vegnin processâts e condanâts a muart cu la acuse di rivolte e di insubordinazion: la sentence e ven lete te Glesie di Çurçuvint, mudade – pe ocasion – in Tribunâl.
Mario Flora, pronevôt di Silvio Gaetano Ortis, di tancj agns si bat pe revision de sentence e pe riabilitazion di chescj soldâts. Ae domande di revision «Il tribunâl militâr di sorveliance al rispuint che no si pues vierzi la pratiche di riabilitazion parcè che la domande a àn di fâle i interessâts – cussì al contave pre Antoni Beline intun so scrit – che a àn di furnî prove di rinsaviment e di buine condote. Alore Mario Flora e il coordenament dai circui culturâi a mobilitin la opinion publiche e a rivin a inaugurâ, te dì dal otantesim aniversari dal procès-farse, une memorie in clap, daûr dal cimitieri, cui nons dai cuatri muarts. Il coordenament al vûl rivâ ae revision processuâl e riabilitazion e al à inviade une altre campagne di sensibilizazion, invidant a mandâ 5.000 cartulinis a Rome. (…) Se i cuatri soldâts a son stâts copâts cence merit, a àn dirit di vê justizie, almancul postume. (…) Rivuart al procès, mi stoi domandant ce sens che al po vê jessi riabilitâts di un sisteme militâr che si è scualificât in chê volte e si è scualificât in cheste eternitât di agns. (…) Silvio, Tite, Basili e Agnul a son stâts disonorâts di un tribunâl cence dignitât, che al à pierdude ogni autoritât. Un tribunâl disonorât puedial onorâ?».
Mario Flora al ten dûr: sul finî dal 2009 al cunvinç il Ministri de Difese La Russa a presentâ la istance di revision dal procès ae Cort militâr di Apel. La scopule e rive tal 2010, cuant che i judiçs e il procuradôr gjenerâl Ferrante, riviodint dutis lis cjartis dal procès, a sierin la cuestion: il materiâl presentât nol è bon pal fat che lis declarazions cjapadis sù intai agns a son consideradis gjenerichis e cence valôr, parcè che no son stadis verbalizadis devant des autoritâts judiziariis.
A distance di 94 agns, la condane e je stade confermade e i cuatri soldâts fusilâts inmò une volte.
Marta Vezzi