TERITORIS – INTERNAZIONÂL. Une gnove oportunitât pal procès democratic intal Paîs Basc

Cuntune declarazion dade fûr ai 5 di Setembar la organizazion armade basche ETA, che bielzà di cualchi mês no veve metût in at azions armadis, e à comunicât une tregue che e permeti di svilupâ lis condizions par une soluzion democratiche dal conflit di maniere che «par mieç dal dialic e dal confront i citadins bascs a puedin decidi dal lôr avignî in maniere libare e democratiche».
La comunicazion di ETA e presente doi elements impuartants di novitât. E je unilaterâl, ven a dî che no je stade cjapade daspò di une cualchi tratative cun istituzions o organizazions politichis, e no met condizions par restâ in vore.
Ancje se no si fevele ancjemò di une tregue permanente e in stât di jessi controlade di organisims internazionâi, chel istès si trate di un pas impuartant che al va in direzion dal progjet di soluzion pacifiche dal conflit fat indenant de çampe indipendentiste basche prime cu la declarazion di Altsasu / Vignesie (Novembar dal 2009) e po cul document Zutik Euskal Herria (Fevrâr dal 2010). Un progjet che al veve cjatât la poie ancje di personalitâts internazionâls che si vevin za impegnadis cun sucès pe soluzion di conflits tant che chel irlandês o chel sudafrican.
La declarazion di ETA e je stade comentade in maniere une vore positive dai rapresentants de çampe indipendentiste basche e di Eusko Alkartasuna che a son cumò impegnâts a meti adun une propueste politiche unitarie in stât di puartâ ae autodeterminazion dal Paîs Basc. Altris sogjets politics bascs, tant che Aralar o Ezker Batua, a àn fevelât di pas indenant, ma a domandin a ETA di meti fin in maniere definitive aes sôs azions.
Il mediatôr sudafrican Brian Currin, adun cun altris personalitâts internazionâls, al à fevelât di ocasion storiche par svilupâ un procès democratic pe soluzion dal conflit basc. Fintremai la puartevôs de Comission Europeane e à dite che a son i elements par une «sperance prudente».
Cui che invezit nol à cjapât par nuie ben la declarazion di ETA a son il guvier spagnûl e i partîts spagnoliscj che le calcolin juste une manovre par platâ la sô dificoltât di azion e par tornâ a organizâ la sô struture operative: une valutazion che, par ce che si à viodût ancje in altris ocasions, e somee un tic clopadice. Il prin ministri spagnûl Zapatero al à dite che nol à «informazions siguris su lis intenzions di ETA» e che nol è il câs di vê fiducie. Pal ministri dal interni Rubalcaba la declarazion di tregue de organizazion armade basche no je avonde e duncje la politiche dal guvier no cambiarà di un et.
Che la linie de repression e sedi la uniche rispueste che e rive di Madrid si lu à capît benon cualchi zornade plui tart cuant che e je stade proibide une manifestazion pai dirits clamade dongje di passe une cuarantine di organizazions diviersis che a vevin chê di sfilâ pes stradis di Bilbao ai 11 di Setembar. Une proibizion che e je stade condanade di dutis lis fuarcis politichis e sindacâls baschis e che e à vût tant che reazion la decision di trasformâ chê che e veve di jessi dome une manifestazion intal cantîr par meti adun un sogjet pe rivendicazion dai dirits che al varà non «Adierazi EH».
No si à po di pensâ che la repression e sedi une cuestion lontane, cemût che al dimostre ben il câs dai trê zovins ativiscj bascs arestâts a Rome ai 10 di Jugn (Fermin Martinez Lakunza, Artzai Santesteban Arizkuren e Zurine Gogenola Goitia) propit par vie che a denunciavin la politiche repressive des autoritâts spagnolis. Se a vessin di jessi estradâts in Spagne, si ben che la lôr uniche colpe e je chê di vê ideis indipendentistis, a riscjin la torture e 12 agns di galere.
Carli Pup