EDITORIÂL – Di bessôi nol significhe sierâsi

E sarà ancje une mê impression, ma no ai viodût masse atenzion de bande di gjornâi e di televisions a chest apontament cu la musiche furlane, che invezit noaltris te «Patrie» o vin decidût di dedicâi tant spazi. E mi soi domandât parcè.
Se si vûl, la manifestazion tal teatri di Udin e pues jessi paragonade in piçul al festival di Sanremo, che al pues plasê o mancul, jessi considerât vecjo e inutil, ma che in ogni câs al è un fenomen de societât taliane.
Alore, une prime spiegazion di chel ategjament di suficience ator de manifestazion di Zampa e pues jessi chê di une critiche al gjenar di musiche, di cjançons presentadis. Forsit di contignûts, ancje se il toc di Giavitto al conte di une cuestion impuartante e significative tant che la imigrazion.
In sumis: par cualchidun al à di cjatâ spazi dome un Friûl che si presenti cuntune muse alternative, divierse, in pocjis peraulis un Friûl «cuintri».
Ma cuintri di cui? Naturalmentri cuintri di un altri Friûl: contadin, bigot, un tic reazionari, di sigûr conservadôr.
E je la classiche e mai finide vision ideologjiche de storie e dai popui, dulà che a meretin rispiet dome chei che a son dacuardi cu la tô concezion dal mont.
Visaitsi che ancje di chê altre bande il mût di resonâ al è compagn, baste savoltâ i sogjets e la interpretazion: e va ben dome la tradizion, lis gnovis esperiencis a puartin dome dolôrs, lis novitâts a fasin simpri scjas.
O vin di cjalâ ae realtât cuntun altri voli, partint di une vision particolâr, chê de autonomie. Chest pinsîr nol è dome la espression di une volontât istituzionâl leade a un teritori, a un popul, ma al è propit un altri svicinament aes cuestions.
Di fat, al partìs dal concet identitari par rivâ a stabilî la centralitât de dignitât in ogni aspiet de vite sociâl. Ricognossi la dignitât di un popul al vûl dì parimentri ricognossi il so dirit ae autodeterminazion.
Il «di bessôi» che tant nus plâs, nol è che une pussibile conseguence di chest resonament.
Cuant che duncje o fevelìn di popul furlan, o vin di vê presinte no une vision ideâl, cun tant di stereotips, imutabil tai siei sintiments, tal so cjalâ il mont, ma di sigûr il so dirit a decidi cemût  frontâ i timps di vuê.
Par chest duncje o fevelìn dal festival de cjançon furlane, no parcè che o sin inamorâts di Zampa, ma parcè che ancje cheste e je une muse de culture, de societât furlane.
Che e plasi o che no plasi, e je robe nestre tant che Arbe Garbe, Flk e dj Tubet, Glauco Venier o U.T Ghandi.
Al scriveve Pasolini a un letôr di Vie Nuove che i domandave un so pinsîr su la muart di so fradi Guido a Porçûs: «Nuie al è sempliç, nuie al ven cence complicazions e passion: e ce che al impuarte soredut e je la savie critiche che e fâs stramaç des peraulis e des regulis, che e va fin insom des robis, dentri la lôr veretât segrete e inalienabile».
DREE VALCIC