CULTURE – FRIÛL TAL ETERE. Se la miss e fevele par furlan

Rilassaitsi. Par vie che chest articul al à di jessi let come se al fos une tace di tisane. Lizere, lizere e cence pensâi sore. Chest viaç o cjacarìn di bielece, vâl a dî di miss. Par vie che Setembar al è il mês des miss: di concors di bielece a ‘nd è a pitinton e si doplein. Miss a torzeon, santulis di manifestazions e cuessis che nancje il persut di Sant Denêl. O scugnìn ricuardâ che la nestre miss regjonâl, in gare chest an, e je une zovine di Faugnà di Martignà, e studie economie ae Universitât di Triest – e fevele ben par furlan. Si clame Martina Floreani, 20 agns. Chê altre finaliste e je Carol Beltram di Caprive, studentesse dal liceu linguistic, nassude tal 1991. E starìn a viodi cemût che e larà cul televôt de jurie di miss Italie.
In spiete dal risultât des votazions o fasìn un ripas, parcè che vie pai agns, tes finâls di Salsomaggiore al è stât plui di un colp di sene… par furlan.
Chel che al jentrà te storie dal program e fo la vitorie, tal 2000, di Barbara Clara, classe 1981, al titul di «Miss Italia nel mondo». La Clara e jere stade sielte in Venezuele, dulà che e viveve, li che il pari, di Sant Tomâs di Maian, si jere trasferît. E je ancjemò un grum leade al Friûl, tant al è vêr che tal sît dal concors si podeve lei: «Parla lo spagnolo, l’italiano, il portoghese e il ‘furlan’». Po ben, te finâl di Setembar e fasè il so «apel al vôt» in lenghe furlane. Daspò dal titul, e à studiât e e à fat un pôc di dut e, clâr, e à fat la modele. Dal Istât di chest an, Barbara Clara e lavore tant che atore, tal cast di ‘Centovetrine’», soap di Canale 5.
Il câs plui resint al è chel de cjargnele Athina Covassi (classe 1990, nassude a Tumieç, residente a Davâr), candidade pal titul tal 2008. La biele cjargnele no rivà par un pêl a lâ in finâl. Dut câs e rimarcà devant di Carlo Conti, in direte, che jê e jere cjargnele e e fevelave cjargnel. Vuê sul so profîl di Facebook e conte 4.600 amîs. Ma ancje se no vin gnovis su ce che e fâs par mantignîsi, intant le vin viodude sul MV a fâ di santule ai bignè di Comeglians…
Duncje, un consei par vinci. Cirît di smaraveâ il telespetatôr, che al sta a cjase, a spietâ fint a tarde ore la vincidore, incjocât de bielecis in concors. Par distinguisi, disêt un «mandi» e fevelait par furlan. Almancul, o cjaparês la atenzion.
PS: cun dute probabilitât, cuant che lis interessadis a leiaran l’articul, al sarà masse tart. Za o cognossarìn la vincidore… po ben, tignît bon il sugjeriment pal prossim an. Ocjo aes cuessis. Sielzêt chês origjinâls, ancje se il concors si clame ‘Miss Italie’».
JAN TOTI