ATUALITÂT – Cuant che la none e jere sexy

PPodie jessi che une batude tra un sindic e une citadine e puarti a meti adun un alc di speciâl tun piçul paisut de Cjargne? Al pâr propit di sì parcè che la mostre ‘L’ai viodude in cjamesute’, screade ai 20 di Jugn e sierade ai 22 di Avost, vierte dome tai fins setemane, e je stade visitade di passe 700 di lôr.
Dut partît propit di une cjacare fate tra Alda Della Pietra e il Sindic di Çurçuvint: «Dai Alda fasìn alc di particolâr?»; «Di particolâr come ce?»; «Ce saio jo! Une mostre di mudandis!»
Une ridade e dut al someave sfantât. Ma la Alda à scomençât a resonâ sore la batude: «Je peti jo al Sindic!» E cussì e à tacât a ravuei dongje materiâl, a sgarfâ tai casselins, a cjalâ tai libris, a zirâ pai paîs… fint che une biele dì, cjatant il Sindic, i à dit: «O soi pronte! Si pues fâ!’
UNE MOSTRE FÛR DAL ORDENARI_ No je une storie inventade, ma la radîs de mostre «L’ai viodude in cjamesute – …1800 è nato l’intimo».
Par sistemâ il materiâl te sale dal Municipi di Çurçuvint e imbastî un troi che al spiegàs la storie dal intim Alda e à domandât jutori al Circul Culturâl ‘La Dalbide’ e insieme a àn mudât la sale consiliâr intune sale di esposizion plene incolme di curiositâts, bacons di furniment nuviçâl, mobilie e… alc di dut.
Il troi al partìs cun riferiments ae lavorazion de lane, de cjanaipe e dal lin, il prin materiâl doprât par dâ vite aes mudandis.
CAMPIONARI UNIC_ La storie uficiâl e fâs nassi chest indument tai prins dal 1800 e cussì il troi al mostre un campionari unic di diviersis formis e colôrs daûr lis esigjencis dei timps, e secont la int che ju doprave. Formis e colôrs che a mudin tai agns fintremai a rivâ a vuê.
Si cjatin duncje tocs ben precîs e cognossûts un timp: il comès, la cotule sot, lis cjalcis cu la scarpete, lis intimelis, lis canovacis, lis cjamesis di gnot… e buine part di chescj induments a mostrin la cure e la rifinidure cun ricams e dissens une vore curâts.
Curiôs e particolâr il vestiari dai fruts piçui cun panzits, fassis e triangui, dute roube che vuê no si sa plui nancje ce che e je.
LA RICOSTRUZION_ Par ben curade te sô esposizion e dotazion, la ricostruzion di une stanze di chê che un timp, legalmentri ricognossudis, a jerin cognossudis tant che «Case di tolleranza»; un cjantonut che al à tirât la curiositât di tancj.
E po inmò lis primis cjarozulis di len pai fruts, lis pipinis di bische, il cumò e la arcje pe dote… insome un mont plen incolm di segnâi di une storie platade… sot dai vistîts.
Celestino Vezzi