CULTURE. Il nestri pes: une sielte inteligjente

No son timps facii pai pescjadôrs dal nestri mâr, simpri plui scjafoiâts de concorince di robe pescjade tai oceans in maniere industriâl (cun mega stabiliments flotants e pes spedît congjelât a presit bassissim ator pal mont), di cuestis ruvinadis di devastantis tecnichis di pescje cence criteri (la nomenade «pescje a strassin», ma parfin, in Grecie e te coste dalmate, cun esplosîfs), e di coscj simpri plui dûrs di frontâ (parsore dut, il gasoli e il cost de lavoranzie, che al dì di vuê si rosein in pratiche dut il vuadagn sudât).
Une crisi che i pescjadôrs di Maran e de nestre Lagune a cognossin ben, a cjalâ il numar simpri plui ristret di barcjis e di lavoradôrs che a rivin a tignî dûr. E che no je contrastade trop des autoritâts, cun normativis pensadis dome a peraulis par tutelâ il mâr, ma fatis cence considerâ che la pescje tradizionâl za di so e nas tal rispiet de nature. Ultin câs – che al sarès di ridi, se nol fos tragjic – e je  la leç de Comunitât Europeane che e viete di cjapâ ciertis speciis di piçui pes, dant di fat un colp mortâl a dute une schirie di pescjis «a la vecje» tai lîts talians (e relative tradizion gastronomiche). Une leç dal 2006, fin cumò derogade (e si visin dome cumò?), che e fâs tant pensâ ae vicende dal «Tocai». E une domande e nas spontanie (polemiche tant che e covente par no cjatâsi tal stes deliri dal non dal vin furlan): ma di front a une leç, clarementri pensade pe pescje tipiche dal Mâr dal Nord, dulà dal osti jerie la rapresentance taliane a Bruxelles, cuant che si à decidude une barbarie dal gjenar?
Dut câs, la int di mâr e à la scusse dure – e chei di Maran no fasin ecezion -, int che no si rassegne a fassi sfracaiâ tant facilmentri. E fâs plasê la notizie di chestis setemanis che, par esempli, un grup di lôr si è metût in cooperative par salvâ il stabiliment de Maruzzella, simbul di une pescje che e alimente ancje une industrie. O ancje viodi ciertis barcjis di pescjadôrs che si tirin sù lis maniis e che a tentin la strade de «pescje turisim», che e pues jessi une maniere inteligjente e concrete di puartâ a cjase cualchi franc in plui, dant ancje une biele man ae culture dal ambient e ae industrie locâl dal turisim.
Ae fin de fiere, però, ce che pardabon al podarès fâ la diference a son i consumadôrs: se ogni femine di cjase, lant a fâ spese, si fermàs un moment a pensâ, e discuvierzarès forsit che – prime di fâsi cjapâ des modis o de reclame e comprâ merluç de Norvegje o gjambars dal Cile – a ‘nd è pes bonissim, pescjât in zornade (il famigjerât «km zero»), bon par fâ un grum di ricetis e che in pratiche nol coste nuie. Provait a fâ il confront, economic e nutritîf: di une bande dôs finis e costosis fetinis di vidiel, di chês che cuant che a tocjin la padiele a van dutis in aghe, e di chê altre un biel chilo di sardelis dal Adriatic, pescjadis in zornade, di fâ panadis te farine e fritis, o «in saor», o ancje dome butadis tal for suntun jet di cartufulis e di rosmarin.
E vâ la pene, no?
____________________________________________________________
Pescjadôrs ai fornei: cuant che il pes di Maran al rive in cusine
Bisats, sfueis, passaris, brancins, oradis, sardelis, caparots, gjambars… Tancj a son i protagoniscj de pescje te nestre lagune, par vie di  un ambient cetant favorevul, cun fondâi bas, temperaduris clipis e la ricjece di aghe nete che e rive jù cui flums. Un ambient cussì bon di jessi ideâl pe nassite des oradis, pes preseât e grande risorse pai pescjadôrs.
In cusine, chês plui dopradis a son dal sigûr lis sardelis, di fâ fritis, di butâ sù pe gridele, o di meti sot «saor», in marinade cun tante civole e savôrs.
Ma ancje il bisat, cu la antighe tradizion di fâlu «in speo», vâl a dî impirât suntun spêt di len aromatic, alternât a fueis di orâr e cusinât su lis boris (une preparazion che e suie la cjar dal gras di masse).
La plui nomenade specialitât de lagune e cjape però il non di Grau, o sei il «boreto a la graisana», une sope di pes puar, chel che i pescjadôrs a savevin di no podê vendi al marcjât e si tignivin par se, par fassi di gustâ intant che a stavin fûr a pescjâ, tai tradizionâi «casons».
E, a proposit di mangjâ puar, no va mai dismenteade une buine friture, cun schiis, agudelis e – particolaritât propit de zone di Maran – i zotui («sotoli», in dialet), che a saressin une vie di mieç tra sepis e moscardins, di 5-6 cm, frits insieme a piçui calamârs. Sperant che la U.E. nus lassi ancjemò jessi un cimi golôs…
Margherita Timeus