L’EDITORIÂL – Semplicitât su la strade par Aquilee

Si cjatìn, come di tant timp incà tal mes di Lui, te basiliche di Aquilee par visâsi des nestris lidriis, ricuardant Ermacure e Fortunât. Il rapuart cu la glesie dal prin cristianesim al è ancjemò fuart, no dome par vie dai libris publicâts, da lis cunvignis, ma tal riul di une fede sclete, tantis voltis fûr dai schemis romans. Si podarès definîle une fede contadine, o ben leade ae tiere. Di fadie e semplicitât.
Cualchidun, ancje Placeran, al diseve che nol podarà jessi un Friûl che nol sedi cristian.
Se cristian al vûl dî il rispiet di chei valôrs che a son la sô fonde, no si pues che jessi dacuardi. Mi somee un tic plui dificil se o pensi a une societât clericâl o, dut câs, dulà che la Glesie e podedi vê un puest di control e di vuide no dome spirituâl.
Magari cussì no ancje par un motîf di numars: simpri mancul predis, simpri di plui imigrants cuntune fede religjose diferente. E che a son chei che a fasin plui fruts. Il Friûl al sarà simpri plui »multietnic».
E, disìnlu clâr, chest al è un regâl di Diu, parcè che cence di lôr la nestre tiere, tai agns a vignî, no sarès plui abitade.
La globalizazion pai furlans e je stade la importazion di un model culturâl e di vite diviers di chel di prime: si podeve evitâ, si podeve trasformâlu in alc di miôr. Forsit, ma cumò e je cussì e o vin di frontâ il probleme.
Nus jude vignî chi a Aquilee, no dome par cjatâsi tra di nô, ma par rinovâ un assum: cjatâ tal spirit che chi si respire lis olmis di vuê.
No si scuen jessi dotôrs de fede par capî cemût che une societât moderne, tant che il Friûl di vuê, e podedi dome cjalâ a chel messaç di universalitât, di rispiet par ducj i oms e lis feminis, par lis lôr lenghis, tradizions, di mût di no someâ a chel model proponût vuê in Italie.
Ma chest discors nus puarte lontan, viodût che dispès la semplicitât e ven confondude cul taiâ i problemis cu la manarie, che tradusût al vul dî viodi il mont o blanc o neri.
Fossial cussì sempliç. La distinzion tra il ben e il mâl che e varès di jessi la plui facile, la plui naturâl, tantis voltis si imberdee in mil musis e opinions.
Tornâ duncje a la semplicitât de analisi, dal judizi, des decisions, al vûl dî butâ vie lis crostis induridis di un mût di pensâ gjenerâl e agradît.
Cualchi esempli lu vin denant e mi pâr bon presentâlu. O cjacari di Sapade e de sô determinazion a tornâ in Friûl. Plui si cîr di tirâ pes lungjis, ancje di bande de Regjon, di no fâ leçs a lôr favôr, plui i sapadins a van indenant tal lôr progjet.
O cjacari dai students dal Malignani che si disin braurôs di fevelâ e di sintî a fevelâ par furlan.
O cjacari dai Cjargnei che no vuelin la aghe in man ai privâts. Aghis, tiere, fruts a son un regâl di Diu, difindiju al è un dovê nestri.
Dree Valcic