TERITORIS – SLOVENIE. Pe Slovenie une gnove aventure mondiâl

E à par titul Slovenija gre naprej («La Slovenie e va indevant») e di vot agns in ca e compagne, tant che imni, lis fortunis de nazionâl slovene di balon. Jessude tal 2002 in ocasion de prime, storiche cualificazion ai campionâts mondiâi che si son tignûts in Gjapon e Coree dal Sud, no stentìn a crodi che tes prossimis setemanis cheste cjançon e vignarà trasmetude dispès tes radios e tes tv dal paîs nestri vicin; almancul che i siei autôrs (Zoran Predin, Peter Lovšin, Vlado Kreslin) no vedin chê di fândi une altre. Lis peraulis dal test a esaltin la imprese dai fantats alenâts in chel moment di Srecˇko Katanec, za zuiadôr de Sampdorie che e vincè il scudet talian tal 1991. Tal test scrit di Lovšin si fevele dai «Slovens in marcje traviers monts e valadis pe glorie de patrie»; e po «tal mâl e tal ben o vivìn in Slovenie, Europe cjalinus, la Slovenie e va indevant!». Il video de cjançon e mostre i trê cjantants che a zuin di balon tal centri di Lubiane, cjapant dentri la int che e passe; in plui, si fasin viodi i puescj plui carateristics dal paîs, de mont al mâr, des citâts aes campagnis, par pandi cemût che il popul intîr al sta dongje ae sô rapresentative blancje e verde.
Partint di chest esempli si pues pardabon capî cemût che la Slovenie e à vivût il sucès de sô nazionâl. Dut câs no jere la prime volte: za tal 2000, cuant che nissun s’al spietave, dopo vê sierât il ziron di cualificazion al secont puest daûr de Norvegje, Katanec al rivà a puartâ i siei zuiadôrs ai campionâts europeans che si tignirin in Belgjio e Olande. Tant al fo un trionf la biele cu la Ucraine di Ševcˇenko (vitorie par 2-1 a Lubiane, pari 1-1 a Kiev), tante e fo la delusion pe eliminazion al prin turni dopo a pene trê partidis (pari cun Jugoslavie e Norvegje, sconfite cu la Spagne).
Une pussibile rivincite e podeve rivâ doi agns dopo, simpri cun Katanec ae vuide dai zuiadôrs de cussì clamade «zlata generacija» («gjenerazion di aur»), li che cjapitani al jere Zlatko Zahovicˇ, numar 10 de scuadre. Ve ca un altri miracul: graciis soredut al regjist de nazionâl, che jenfri il 1992 e il 2004 al à metût dongje 80 presincis segnant 35 rêts, la Slovenie e rive seconde tal ziron daûr de Russie lant cussì a zuiâ la biele cu la Romanie. Ancje in cheste ocasion no podeve lâ miôr: vitorie par 2-1 a Lubiane, 1-1 invezit a Bucarest e Mondiâi in sachete. Magari cussì no, come doi agns prime la aventure si ferme za al prin turni: trê sconfitis cun Spagne, Sudafriche e Paraguay.
Di là de figure no masse positive (cuatri rêts segnadis a Euro 2000, trê ai Mondiâi 2002), cheste dople vetrine internazionâl tal zîr di a pene doi agns e à permetût a un paîs di doi milions di abitants di fâ cressi la sô braure e la sô autostime tant che popul. E chest midiant il sport, come tancj esemplis (positîfs e, magari cussì no, ancje negatîfs) che a son stâts vie pai secui. Tal câs de Slovenie, i sucès de nazionâl a son rivâts juste tun moment di cressite di un stât zovin, dut cjapât te sô corse viers il tren che al menave te Union europeane e che al puartave a une sorte di sfrancjament definitîf dai Balcans. Par chest, i Slovens a stavin daûr soredut a dissiplinis tipichis des lôr tradizions che a pandevin la lôr identitât nazionâl, tant che il schi, i salts cui schis, l’hockey su la glace. La atenzion viers il balon di cjase e jere une vore scjarse: la massime serie (Prva Liga, www.prvaliga.si) e à viodût tai prins dîs agns di vite la rivalitât jenfri l’Olimpija Ljubljana e il Maribor, ma la cualitât dal balon zuiât no jere cuissà ce.
La situazion e je cambiade di uns dîs agns in ca: cul spazi prime continentâl e dopo mondiâl concuistât a pet di scuadris di grande nomee, la nazionâl e je rivade a otignî preseament di bande de int.
Al è dal sigûr cussì ancje pe seconde volte de Slovenie ai Mondiâi. Finît il ziron di cualificazion daûr de Slovachie, i zuiadôrs di Matjaž Kek (alenadôr dal Fevrâr dal 2007 cun contrat fin al 2012) a àn vût di sfidâ ae biele nuie di mancul che la Russie. Pierdût 2-1 a Moscje, a Maribor sucès 1-0 e biliet pal Sudafriche in sachete. Tal grup C la Slovenie e sta frontant Ingletiere, Stâts Unîts e Alzerie. Sierant il ziron prime o seconde (risultât che, cjalant i aversaris, nol pâr impussibil), la Slovenie e zuiarès i otâfs di finâl cu la prime o la seconde dal grup D (chel de Gjermanie).
ALESSIO POTOCCO