Pordenon e l’Imperi: une storie di diversitât in Friûl

La vicinance storiche di Pordenon al Imperi (e par jessi precîs ae dinastie dai Asburcs) confrontade al rapuart cun Vignesie e je un dai cjapitui plui biei e “anomai” de gjeografie politiche de nestre regjon. Par secui, Pordenon al è stât stât a ducj i efiets une enclave austriache (o miôr, une exclave) tal cûr dal Friûl. Intant che i teritoris ator a rispuindevin prime al Patriarcjât di Aquilee e dopo ae Republiche di Vignesie, Pordenon al cjalave dret a Viene. Lis lidrîs di cheste diversitât si fondin inte Alte Ete di Mieç. Za ai timps dai Langobarts e po dopo in chei de dinastie francje caroline, il teritori di Pordenon (la antighe Curtis Naonis) al jere une “cort reâl”. Nol jere un feut di altris gjestît di un baron dal puest, ma une proprietât drete dal sovran, che in chest câs al jere de famee dai Asburcs. Chest status speciâl le liberave des jurisdizions dai siôrs locâi e parfin dal duche dal Friûl, metintle sot de protezion imperiâl direte. Vie pal secul XIII, dopo jessi passade pes mans dai duchis di Baviere, di Carinzie e di Babenberg – dutis signoriis che in mût clâr a son “talianissimis”, no mo? – Pordenon al jentrà in maniere stabile te orbite de zovine potence asburgjiche. Tal 1272 (ma uficiâl dal 1282 indenant), la citât e deventà proprietât personâl di Albert I di Asburc, fi dal imperadôr Ridolf I. Di chel moment e par plui di doi secui, Pordenon al deventà une tiere de Cjase di Austrie. I citadins a jerin braurôs di pandi la lôr fedeltât ai duchis di Austrie (che dispès a jerin ancje imperadôrs dal Sacri Roman Imperi), e in citât al jere implantât un Cjapitani cesareu (ven a stâi un governadôr imperiâl) che al aministrave la justizie dal cjistiel de citât intal non dal imperadôr. Une isole asburgjiche in tiere furlane, duncje! Par chest Pordenon al otignì dai Asburcs i statûts comunâi tal 1291 e il titul uficiâl di “citât” tal 1314. Al ven di ridi, alore, a pensâ che la braùre sbandierade pal titul di “Citât taliane de culture” e varès di rompi lis alis dome a pensâ che il titul di “citât” al è un ricognossiment asburgjic, e la “culture” di chê citât e à simpri cjalât a Viene e a Praghe, no sigûr a Vignesie e ancjemò mancul a Rome. Sui palaçs di Pordenon al svintulave il steme cul scût ros e blanc, i colôrs de dinastie austriache. Tal 1420, la Republiche di Vignesie e concuistà il Friûl, metint fin al podê temporâl dal Patriarcjât di Aquilee e scomençant une opare lente e crudêl di distruzion di une storie e di une identitât. Vignesie però e scugnì fermâsi devant des muraiis di Pordenon; stant che al jere un teritori di ereditât dai Asburcs, la citât no podeve jessi anetude cence tacâ une vuere totâl cul Imperi, e chest, par cumò, Vignesie no sal podeve permeti. Par chest, te transazion dal 1445 (l’acuardi che al fissave il passaç dal Friûl a Vignesie), Pordenon al fo escludût za dal principi dai dominis venezians. Al podè duncje restà un sudit fedêl de Austrie cercenât dal teritori de Serenissime. Cheste situazion di “Stât tal Stât” e creà tensions comerciâls e militârs continuis jenfri Vignesie e l’Imperi, fin che tal 1508, dilunc de vuere de Leghe di Cambrai, il famôs cjapitani venezian Bartolomeo d’Alviano al assedià e al ocupà Pordenon par cont de Serenissime. L’imperadôr Massimilian I di Asburc al fo costret a cedi. Vignesie, par premiâ d’Alviano, i fasè un grant e biel regâl: Pordenon tant che feut personâl. Ae muart di so fi Livio tal 1537, la citât e passà sot dal control diret di Vignesie, che e implantà sul puest un proveditôr, integrant infin Pordenon te sô aministrazion, ancje se la citât e tignì une cierte autonomie e une identitât “divierse” rispiet al rest dal Friûl. Duncje Pordenon al è stât “imperiâl” par vocazion origjinarie e par dirit dinastic: un piçul toc di Austrie bagnât dal Nunciel che al à resistût ai leons di Sant Marc par plui di dusinte agns. Lis testemoneancis scritis plui fuartis e dretis di cheste “filiazion gloriose” a son i documents uficiâi dai duchis di Austrie e dai imperadôrs dal Sacri Roman Imperi, une racuelte cetant siore e poiade dal pont di viste storic tal “Diplomatarium Portusnaonense”. Intes pergamenis sigladis e boladis di Ridolf I e dopo di Albert I di Asburc (jenfri il 1272 e il 1291), Pordenon al ven protezût in maniere sigure e si lu definìs tant che tiere di elezion imperiâl. Analizant i tescj, si intint ben la volontât dai Asburcs di fâ di Pordenon un “baluart” di fedeltât inclaudât intal cûr di teritoris ostîi, Vignesie in primis. In scambi di cheste fedeltât, i Asburcs ur devin ai pordenonês esenzions fiscâls, dirits di passon e di len, e ancje, robe no comune, la pussibilitât di aministrâsi di bessôi. La testemoneance scrite plui impuartante de identitât de citât e je duncje il Statût dal 1291, concedût dal duche Albert I di Asburc. Chest document (scrit suntune grande pergamene che vuê e je conservade tal Archivi di Stât di Pordenon) nol jere dome un codiç di leçs, ma un vêr pat di fedeltât. Intes premessis e intes formulis di zurament che a son dentri, e ven fûr dute la braùre dai citadins di jessi sudits drets de Cjase di Austrie, un status che ju distingueve dai “rustics” che a vivevin tal rest dal Friûl e che a jerin invezit sometûts a siôrs locâi o ai patriarcjis. Ancje dopo dal passaç sfuarçât sot Vignesie (fat tal 1508 e deventât uficiâl tal 1537), la memorie de autonomie e dal leam cul Imperi e restà une vore vive te storiografie locâl di Pordenon, jessint dispès idealizade in clâf “filoasburgjiche” par difindi i privileçs de citât cuintri dal centralisim venezian. Intal so famôs Comentari Urbani, Battista Pomo (1728-1791, storic e cronist pordenonês, al conte cun precision e une ponte di nostalgjie il passât imperiâl de citât. Pomo al dimostre cemût che Pordenon, ancje se di “costums furlans”, al jere “austriac” dal pont di viste aministratîf e ancje cemût che al fos tibiât in particolâr des tantis imposizions fiscâls rivadis dopo cun Vignesie. Su lis sôs pagjinis si viôt ben dute la braùre e ancje il marum par chê antighe libertât garantide dai Asburcs e aromai pierdude. Fra i tancj documents storics a testemoneance di cheste “alteritât” a son ancje memoriâi dal Sietcent scrits dai juriscj e dai nobii pordenonês mandâts al Senât venezian par difindi la autonomie dal teritori. In chescj tescj, par justificâ i lôr dirits, i pordenonês a tiravin fûr come prove e cun grant rispiet i diplomis antîcs dai sovrans di Austrie (come chel firmât dal imperadôr Massimilian I), batint sul fat che il leam culturâl e juridic cul Imperi no si fos mai distudât dal dut te cussience de citât. Capitâl de culture, sì…ma taliane? ❚