Suns Europe 2026: al è fûr il bant par grups e musiciscj

FRIÛL – Al è fûr il bant pe gnove edizion di Suns Europe: il festival des arts intes lenghis minorizadis de Europe inmaneât de cooperative Informazione Friulana, editore di Radio Onde Furlane, cu la poie finanziarie de Regjon Autonome Friûl – Vignesie Julie e di altris sogjets publics e privâts, di chenti e internazionâi. Il Festival, come par solit, si davuelzarà a Udin e in altris lûcs dal Friûl vie pal mês di Otubar di chest an.
◆ MUSICHE INOVATIVE – Par mieç di chest bant, compagn di ce che al sucêt di dodis agns incà, i organizadôrs a àn chê di cjatâ fûr grups e musiciscj che la lôr produzion e je fate intune des lenghis espression des comunitâts minorizadis de Europe, daûr de definizion che si cjate intal articul 1 de Cjarte europeane des lenghis regjonâls o minoritariis. Il festival al à chê di dâi evidence aes propuestis calcoladis lis plui origjinâls e inovativis.
◆ LA SELEZION – Par candidâsi, dentri dai 15 di Lui dal 2026, i artiscj a àn di compilâ il modul che al è te sezion di pueste dal sît www.sunseurope.com compagnantlu cui materiâi domandâts. La selezion e sarà fate po a judizi totâl dai organizadôrs dentri dai 16 di Avost dal 2026 e comunicade a cui che al à partecipât par pueste eletroniche. I artiscj o i grups selezionâts a saran invidâts a partecipâ al festival par sunâ dal vîf lis lôr cjançons intant de serade finâl dal festival che chest an si davuelzarà a Udin ai 10 di Otubar. Dut câs la organizazion e cirarà di dâi ai artiscj la pussibilitât di presentâ la lôr produzion musicâl ancje in altris moments de manifestazion.
◆ Par sclariments, informazions o altri, si pues scrivi a info@sunseurope.com ❚