Aziende Agricule Vinadia, la gnove aventure di Dario e Federica

Lassâ un puest fis par tacâ une gnove aventure no je une decision facile, ancjemò di plui se si decît di fâlu in Cjargne, intun paîs di mont, pontant su agriculture, nature e ospitalitât. Al è chest il percors di Dario Del Fabbro e Federica Beggio, fondadôrs da Aziende Agricule Vinadia, une aziende zovine e nassude di pôc plui di un an, ma che e à za scomençât a fâsi cognossi pe origjinalitât dal so progjet e pe passion che i doi ideadôrs a metin in dut ce che a fasin.
◆ “La idee a è nassude tal 2020, intal periodi da pandemie” – a contin Dario e Federica. Cjalant un cjamp dongje de cjase di famee indulà che a lavin a passâ cualchi dì di feriis di Istât, Federica si è imagjinade di viodi doi filârs di lavande che a compagnavin il viâl bande la vecje cjase. Chê imagjin e je deventade in curt un progjet di vite. Cussì a àn decidût di cambiâ dut: Dario al à lassade la cariere di uficiâl dal esercit, Federica à molât il so lavôr e, cun doi fruts piçui, a àn bandonât Spilimberc e si son trasferîts in Cjargne par meti in pîts une aziende agricule fondade sui valôrs da famee, tal rispiet pe nature e par une vite plui semplice.
“La cjase dulà che vuê e je la sede di cheste aziende e à une storie lungje – al conte Dario – si cjacare dal ‘800. E je stade de famee di gno pari, che al è origjinari di achì, e e rapresente un leam fuart cu lis mês lidrîs. Di chest lûc al è nassût un progjet che nol vûl jessi dome une aziende agricule, ma ancje un puest di incuintri e di condivision.”
◆ In chest moment la aziende e coltive verduris, jerbis aromatichis e lavande e a vegnin preparâts prodots artesanâi. A chest si zonte ancje la apiculture, puartade indevant cun grande atenzion pe biodiversitât e pai ritmis da nature. Il progjet, però, al va ben plui inlà da produzion agricule.
◆ Dario e Federica a stan spietant di podê completâ un laboratori di trasformazion e une aree degustazion, dulà che i visitadôrs a podaran cognossi e gustâ i prodots da aziende. Inte lôr vision future a previodin ancje spazis dedicâts ai cicliscj e ai turiscj che a passin pe piste ciclabile che e cor li dongje, come ancje ativitâts dedicadis al benstâ fisic, tant che meditazion, yoga e altris esperiencis par tornâ a cjapâ contat cun se stes e cu la nature.
◆ Tra lis primis iniziativis organizadis e je stade la racuelte de lavande. Par doi fins di setemane i visitadôrs a àn podût jentrâ tal cjamp, taiâ il lôr macut di lavande e passâ cualchi ore intune atmosfere di calme e semplicitât; une ocasion par cognossi une realtât gnove e, tal stes timp, par scuvierzi il plasê di fermâsi a gjoldi la bielece da nature.
Cjase Vinadia, par Dario e Federica, e rapresente la idee di une cjase vierte, di un lûc dulà che cui che al rive al pues sintîsi benvignût, cence corse e cence pressions.
◆ “Ancje se o rivìn di fûr de Cjargne – a continuin – o sin stâts acetâts benon di cheste comunitât. Par nô chest teritori al sta vivint un moment di riscuvierte: simpri plui personis a tornin a dâ valôr ae vite di mont, ae cualitât dal ambient e ae pussibilitât di vivi cuntun ritmi plui uman.
◆ No mancjin lis dificoltâts. La burocrazie e je une des plui grandis sfidis par une piçule aziende agricule come la nestre. Lis regulis a son pensadis massime pes realtâts plui grandis e no tegnin cont des particolaritâts das aziendis familiârs di mont. Timps luncs e autorizazions complicadis a riscjin di frenâ iniziativis che a podaressin dâ un contribût impuartant a valorizâ il teritori.”
◆ Di là di dut, Dario e Federica a continuin a cjalâ indevant cun entusiasim. Il lôr obietîf nol è chel di fâ une grande imprese, ma di dâ vite a une realtât sostignibile, che e permeti ae famee di vivi ben e che e dedi aes personis che a van alì une esperience autentiche.
◆ La storie di cheste aziende agricule e je la storie di un tornâ aes lidrîs; une sielte coragjose che e dimostre cemût che ancjemò vuê la Cjargne e pues rapresentâ une oportunitât par cui che al crôt intal valôr de tiere, de comunitât e a un stîl di vite plui sempliç e plui dongje ae nature.
◆ Forsit al è propit chest il messaç plui impuartant che Dario e Federica a vuelin trasmeti: tornâ a dâ valôr a ce che o vin dongje di nô, imparâ a lâ plui planc e a vê braùre dal nestri biel teritori.
◆ Par curiositâts e informazions, cirî “Az. Agricola Casa Vinadia” su Facebook. ❚