Il libri si vierç cuntune poesie di Leo Zanier, “Doman”, (sì, chê de polemiche resinte a Udin) e, in curt, a son i ats di une cunvigne organizade de çampe radicâl furlane, metude adun de clape di studis di Borc Aquilee e tignude pôc timp daspò dal stes taramot, ai 3 di Lui dal 1976. Ma il libri al è tant di plui, e prin di dut al è un biel cuadri des lotis popolârs furlanis di chê volte. Un dai pôcs cuntune vision socialiste e nazionalitarie sul taramot, che e denunzie l’ûs strumentâl in sens militarist e politic (democristian), la capitalizazion dal profit, il consolidament dal stereotip dal furlan “salt, onest e lavoradôr” (ribel? figurâsi!) e di rinovament dal flus migratori de popolazion furlane, cuintri par altri ae autoorganizazion popolâr e ai jutoris indipendents, platâts de storie istituzionâl.
◆ La introduzion e je une analisi che e tocje un grum di cantins, des fuarcis politichis e sindicâls ae universitât, e subit daûr si cjatin une schirie di intervents e comunicazions, cun nons une vore impuartants pe culture e pe societât furlane tant che Pier Carlo Begotti, Adrian Cescje, Toni Capuozzo (in chê volte dentri Lotta Continua, cuntun intervent sore l’ûs militâr dal teritori), il scritôr toscan Sergio Salvi, l’ativist sloven Samo Pahor, Giorgio Cavallo e tancj altris, cjapant dentri cuistions tant che architeture, psichiatrie, autodeterminazion furlane e cuistion nazionâl, moviment operari, sisteme sanitari, industrie, agriculture, e vie indenant. Si cjate fintremai la letare di un emigrant. In sumis, di cantins frontâts a ‘nd è tancj e se cualchidun al è aromai obsolet, tancj altris a restin bogns e di ispirazion pal dì di vuê. Ma, soredut, al vâl la pene lei documents tant che chest par vê une vision critiche de ricostruzion, dal taramot e des istituzions dal Friûl, mancul stereotipade, banâl e rituâl (in pratiche, diferente di chê dal passât cincuantesim) e che no si piert dentri di une vision univoche o elegjiache.
◆ Par sierâ, un toc dal intervent di Cescje: “La pore di no jessi vonde universâj te analisi di classe de situacion furlane, dongje de buine volontât di analisale, ur à fât lassâ dî […] che fevelâ par furlan ancje ta che ocasion nol jere un bon siervici pe cause furlane stesse, parvîe di chês persones vegnudes alì che ‘l furlan no lu capivin. Nissun si jere impensât che si podeve meti qualchidun a voltâ e riassumi par talian.
Ma stant che qualchidun al-à dite che la lenghe a-è la realtât dibot sclete dal pensîr, e che j furlans non san mai ben ce lenghe sielgi quantche a-fevelin […] j furlans inalore no san dulà che al-finiss el lor pensîr, e dulà che al-scomence chêl di chejatris, cjapât a dimprest. E nol è un bon siervici pe lote di classe gjavaûr es classes popolârs la lôr lenghe, signâl de lôr identitât nacionâl talpassade; nancje se si lu fas pai ospits che no le intindin.
El nacionâl-siovinisim di drete e di çampe al-à simpri vude bisugne di platâsi daur dal universalisim astrat de paradure di qualchi ospit che al-rapresentass la culture sorestante par meti in bande la culture e la lenghe di une minoritât nacionâl oprimude”. ❚
