✽✽ Intun incuintri public resint su la riedizion des Provinciis, un esponent di centriçampe a un ciert pont dal so intervent al à dit chestis peraulis: “Come ho sentito menzionare certe proposte anacronistiche sul futuro di Aquileia”. Al faseve riferiment aes ipotesis di une aree largje che e cjapàs dentri ancje il circondari di Çarvignan inte provincie dal Friûl Orientâl, idee dade sù intal dibatiment, ma ancje desideri di cui che al viôt inte citadine patriarcjâl la capitâl naturâl di une Regjon no plui centrade su Triest. Al è simpri sucedût che la çampe taliane e acusàs di anacronisim chei che a metin in discussion la organizazion istituzionâl de Regjon. Dibant e cence risultâts i tentatîfs di personaçs autorevui tant che Baracetti a Pascolat par provâ in maniere timide a meti dut in discussion: ducj a panze injù devant di Triest e ae struture creade a sô sumission e tal so stamp.
✽✽ In maniere ancjemò plui scjassose si môf la politiche de drete, cu la propueste fotocopie di chês Provinciis che Serracchiani e veve abolît par passâ ae storie e che par cause di chê e je stade batude.
Ae fin il risultât al è il stes: e trionfe la citât-stât triestine e il rest al à di produsi par mantignîle in salût. Chest in efiets al sta za sucedint cu la posizion internazionâl in ducj i setôrs che e je è daûr a garantîsi.
✽✽ No stin a iludisi duncje che in chest contest bipartisan alc al puedi cambiâ, calcolant cun di plui che in ducj i partîts, di là di une oposizion formâl, i aspirants ae poltrone no mancjin.
✽✽ In cheste situazion si è fate strade la prove de bande di un grup di autonomiscj di cjapâ sù cinc mil firmis par lâ a un referendum che al viodi la separazion dal Friûl di Triest. Obietîf nobil e pericolôs tal stes timp, parcè che il no otigniment des firmis al sarès ancjemò une volte une cjarte in man a cui che al definìs i furlaniscj “cuatri gjats”. E se ancje al rivàs al numar necessari, al esist la pussibilitât concrete che al vegni bolât, e no sarès la prime volte, come chei proponûts timp indaûr di Albert di Cjaurià e, plui dongje tal timp, di Mario Anzil.
✽✽ Jessi anacronistics vuê, par nô, al è un compliment, anzit un invît a continuâ su chel troi segnât di pre Checo Placerean: “Se domandâ la autonomie al è masse, alore o domandarìn la indipendence”.
✽✽ Chê di pinsîr. Chê di contâ la storie vere de nestre tiere, chê di no fâsi sotanâ di un globalisim cence anime di un statalisim che dal Friûl e dai furlans, di simpri, nol vûl sintî fevelâ. ❚
