Fâ e disfâ al è dut un lavorâ (a cessecûl). La ocasion pierdude par tornâ a dissegnâ la Regjon

A son passâts vot agns de elezion dal president Massimiliano Fedriga tal puest di Debora Serracchiani, che e veve volût scancelâ lis Provinciis de mâlnassude Regjon Friûl-Vignesie Julie cjatant in chê volte la aprovazion di ducj, stant che il proviodiment al jere stât votât ae unanimitât. La riforme dai ents locâi dal centriçampe (cu la istituzion des Unions Teritoriâls Intercomunâls, lis UTI) e veve cjatade une oposizion fuarte di bande de coalizion di centridrete e cussì, tal 2018, Fedriga al veve imprometût in campagne eletorâl di tornâ a dissegnâ il cuadri istituzionâl di rapresentance dai teritoris e des comunitâts di une Regjon plurâl.
◆ Cemût descrivi su la cjarte la “unitât inte diversitât” di une Regjon mosaic? La riforme dai ents locâi e podeve jessi une ocasion par cjalâ al avignî, come che a vevin fat – par resons diferentis – il Fassisim tal creâ la “Venezia Giulia” e la Republiche Taliane tal creâ la Regjon Friûl-VJ prin, e la Provincie di Pordenon pôcs agns dopo. A son stadis dutis sieltis fatis imagjinant une articolazion dai teritoris che e someave rispuindi a une domande de coletivitât: la anession des tieris concuistadis te Prime Vuere tal prin câs, la autonomie rispiet al Venit tal secont e la autodeterminazion rispiet a Udin tal tierç.
◆ Par chest nol è facil capî cemût che in vot agns la maiorance in Regjon no vedi fat nissun sfuarç par lei la domande sociâl e comunitarie che e ven des comunitâts furlanis. La decision dopo vot agns cence discussion publichis partecipadis, cence nissun procès di scolte de opinion publiche fûr dai palaçs dal podê, cence nissune iniziative inovative par fâ viodi cuale che e je la reson fuarte par rivâ ae sielte che e je stade adotade. Une sielte cence fantasie e cence progrès, ven a stâi tornâ come prin, tornâ a fâ lis Provinciis che ducj ae unanimitât a vevin refudât, e che cumò a tornin bot e sclop a deventâ une soluzion miracolose pai problemis dai citadins.
◆ La veretât e je che la plui part de int no à viodude diference tra la azion des vecjis Provinciis e i Ents di Decentrament Regjonâl (EDR) che a vevin cuviert part des lôr funzions. La resurezion di chei ents che a jerin muarts cence nissun corot e fasarà comut soredut a chei che a laran a sentâsi su lis lôr comudis cjadreis. Ai citadins de Regjon lis lôr indenitâts a podaressin costâ plui di un milion ogni an, cence lis spesis di segretarie e di funzion che a coventaran e lis spesis pe elezion direte dai aministradôrs. Cun di plui a van contadis ancje lis spesis par trasferî il personâl, che al sarà incentivât cun sîs mensilitâts extra. Pantalon in chest câs al tirarà fûr almancul 6 altris milions di euros.
◆ I fautôrs di cheste sielte a disin che “La democrazie e coste” e “la volontât popolâr no à presit”: ancje cuant che in realtât il popul, come in chest câs, nissun lu à mai sintût. Su lis Provinciis al sarès stât ancje un precedent: chel che Riccardo Illy al veve volût su la Provincie de Mont. La int e à dit di no, e no si è fate. Se e je vere che “scoltâ la int nol à presit”, parcè in cheste situazion no si isal volût misurâ il parê dai citadins?
◆ Il Friûl al à voie di lâ indenant, e no a cessecûl: par chest la riforme des Provinciis e je une ocasion pierdude, di chei che le àn volude e di chei che no àn mai puartât su la taule de discussion veris propuestis inovativis buinis di regalâ ai furlans une prospetive di avignî.. ❚