La tiere e je alc che cualchidun al puarte tes sôs lidrîs, e che cualchidun altri le puarte sù pe spale pardut là che al va. Simone Piva, pai amîs e pai siei fans dome “il Piva”, al aparten a cheste seconde categorie.
Ghitarist, cjantautôr, un fûr dal trop. Al ven di Cividât e di cuasi vincj agns al zire la Italie cu la sô musiche contant il Friûl fûr dal Friûl, cu la ustinazion di cui che al sa che la sô tiere e vâl la pene di jessi cognossude. E cussì se puarte daûr: tai tescj, test storiis, te vôs.
◆ La sô biografie sui canâi sociâi e dîs dut in trê peraulis: “o cjanti e o conti il Friûl”. E lu fâs pardabon, no dome par folclôr, ma par necessitât. Tes sôs cjançons a son passâts Tina Modotti, Federico Tavan, Pier Paolo Pasolini, Ezio Vendrame, Primo Carnera, le lotte del Cormôr, l’Orcolat dal ’76. Il Friûl come cistierne di umanitât, no dome come cartuline.
La sô cariere e tache tal 2008 cul progjet rock “Simone Piva & i Viola Velluto”, e cun lôr al publiche cinc albums distribuîts in dute la Italie. In chel jenfri al condivît palcs cu Nada, Zen Circus, Tre Allegri Ragazzi Morti, Morgan, e al puarte la sô musiche fin tal “Petit Théâtre du Bonheur” di Parîs. Al è ospit di trasmissions televisivis e radiofonichis a nivel talian e al è stât tra i protagoniscj dal documentari “Ai Confini del Rock”, distribuît in dute la Europe. Tal 2024 al jes il so prin album di solist “La macchina non si è mai fermata”.
◆ “Da dove nasce il vento”, secont album di solist publicât tal Autun dal 2025, al è stât regjistrat dal Edac Studio cu la produzion di Davide Lasala e Andrea Fognini e distribuît di Believe Music Italia. Dîs tocs, un disc che al ten dongje un rock sedi combatîf, sedi lizêr e delicât. Un album che si scolte dut di un flât.
◆ “Cosa siamo diventati” al vierç il disc cun fuarce: diret, urgjent, subit al centri dal teme de identitât e dal cambiament. “Il baule del diavolo” al zonte colôr e teatralitât cuasi cinematografichis. “Sulle nostre tracce”, il toc che plui di ducj al strissine, al ricuarde i sunôrs dai Negrita. La cjançon “Irene”, invezit, e je une fotografie di un ricuart dal passât, di une vite fate di sacrificis e sieltis dificilis, energjiche e no malinconiche. “La leggendaria ballata di Bill” al è rock che no ti lasse redenzie. “L’ultima locanda ai bordi dell’Europa” e “Hotel Praga” a son doi tocs che a evochin il stîl di Cesare Cremonini, cun chê capacitât di rindi epics i lûcs di confin.
◆ “Oltre il confine e Fantasmi abbassano le luci” al lasse spazi ae riflession.
Il merit plui grant di Simone Piva al è chel di vê dât a ogni toc une personalitât distinte, cence mai pierdi il fîl ros dal album. Il rock e je la lenghe mari dal disc, ma ogni toc al tabaie cuntun ton e cadence distints: un pôc becant, un pôc poetic e cualchi volte intim.
“Da dove nasce il vento”, al è un album che si lasse scuvierzi pôc a pôc e che al conte, tra lis riis, di un Friûl che nol mole mai di fâsi domandis.
◆ Cun dibot 20 mil followers su Instagram e plui di 9 mil su Facebook, il Piva al è un dai artiscj furlans plui atîfs e seguîts sui canâi sociâi, che al è simpri ator pe Italie, tra concierts, podcasts e trasmissions radiofonichis. Il tour di “Da dove nasce il vento” lu à za puartat di Seregno a Morbegno, de Spagne aes piçulis e grandis realtâts de sene indipendente taliane.
Par savê cuant e dulà che si podarà lâ a viodilu e sintîlu in Friûl, stait daûr dai siei profîi social.
Il gnûf album “Da dove nasce il vento” al è disponibil su dutis lis plateformis digjitâls. Par info e contats:
@simone_piva_official su Instagram, o la pagjine uficiâl Facebook. ❚
