“Cuissà se i schiadôrs che di Invier, cjapâts de premure di tornâ jù di buride te valade, a passin rumorôs pes pistis marcadis su lis clevis che a puartin a Nevee o che a tornin jù su la lungje piste che e mene a Pleç, o i vacancîrs che di Istât a passin pai trois che a van sù pes valadis de Racolane, de Resie, dal Lusinç (…) a àn la juste percezion di dulà che, forsit cun distrazion, a stan lant”.
◆ Opare a plui mans intun siôr libri di 28 cm par 21, cun dusinte e cincuantevot pagjinis spartidis tal mieç fra talian e furlan. In plui dai doi curadôrs, o vin contribûts (ducj di alt nivel) di Mauro Pascolini che al firme la prefazion, di Odorico Serena sul Sintiment dal sacri inte storie, di Teresa Tochia: La mont Cjanine puarte dal infier, Maurizio Puntin: A proposit di nons cun etimologjie trasparente, il câs de mont Cjanine e Maurizio Tavagnutti: L’altiplan de mont Cjanine e i siei çondars. Antropologjie, gjeografìe, storie, filosofie, toponomastiche, speleologjie si dan di volte in chestis pagjinis cun sgrimie e competence. La mont Cjanine e à simpri vût une grande impuartance inte tradizion folkloriche furlane. Al jere il puest dal cjastì pes animis danadis, e jere la puarte dal Infier. Lis colpis a podevin sedi cetant grivis tant che omicidis, ma ancje mancjancis che in dì di vuê nus fasin ridi: l’ostîr che al slungje il vin cu la aghe, il mulinâr che al imbroiuce cu la mundure, la zovine che e fâs un bal cuntun che no cognòs. Chest libri nus compagne fin dentri intes motivazions che a fasin nassi intal popul lis contis di spirts malins, di striis, di aganis, di krivapetis e des tantis parencis che al podeve cjoli sù il diaul. I rumôrs che si sintivin, il rondolâ des pieris jù de mont a jerin opare di chestis animis mandadis là sù daspò dal Concili di Trent. E no si pues no marcâ la impuartance di chest event intal imagjinari coletîf dai furlans: daspò di chê volte, di fat, il sorenaturâl al è stât une vore ridimensionât: “Dopo el Concili di Trent no si à plui sintût nuie” (p. 51). E di dulà vegnial il non ‘Cjanine’? Probabil dal latin ‘canus’, ven a stâi ‘blanc’. Ma Puntin nus met in vuaite: a son almancul sîs ipotesis pussibilis (p. 105).
Une vore espressîfs ancje i sedis (plui i doi des cuviertinis) biei dissens, che cuatri a son di De Pelca, vignût a mancjâ prime che il so libri al viodès la lûs. ❚
