La lezion pussibile dal sucès dal PC in Gales e de conferme dal SNP/PNA in Scozie

La crisi dal bipartitisim “classic” fondât sul confront tra Laburiscj e Conservadôrs, la incressite dal nazionalisim a trazion inglese, populist e suprematist, rapresentât di Reform UK, e la afermazion di dai partîts nazionalitaris e teritoriâi progressiscj de Scozie (Partît Nazionâl Scozês, SNP/PNA) e dal Gales (Plaid Cymru, Partît dal Gales: PC). Al è ce che al è saltât fûr, in maniere fuarte e clare, salacor ancjemò di plui di ce che si spietavisi ae vilie, des elezions “regjonâls” e locâls dai 7 di Mai stâts tal Ream Unît. La pierdite plui significative, par ce che al tocje i consens e la presince tai conseis comunâi e tai parlaments scozês e galês, e je chê che e je stade patide de bande dai Laburiscj. I risultâts des urnis a son stâts calcolâts ancje dentri dal partît dal premier Keir Starner tant che une palese mancjance di fiducie de bande de int viers dal so guvier.
◆ Il Labour al à pierdût dapardut e in particolâr al à cjapât une sdrondenade in Gales, dulà che al jere il partît di maiorance relative intal Senedd, il parlament “regjonâl”, al jere al guvier cu la sô leader Eluned Morgan e plui in gjenerâl si cjatave intune posizion di prevalence di sù par jù un centenâr di agns. Chês dai 7 di Mai stâts a son stadis lis primis inmaneâts daûr de riforme eletorâl e istituzionâl, segnade di une bande di un sisteme proporzionâl e di sedis coleç plurinomenâi e di chê altre de gnove composizion dal Senedd, là che prime a jerin sessante seçs e cumò a ‘nd è novantesîs. Se i Laburiscj a son chei che a àn pierdût, i vincidôrs a son chei dal Plaid Cymru (PC), che cul 35,4% dai vôts a incressin il lôr consens di passe il 14% rispiet aes elezions passadis e a concuistin cuarantetrê parlamentârs e cumò, cirint te assemblee chei vôts che a mancjin, a son daûr a meti adun il gnûf guvier cun Rhun ap Iorwerth, esponent di ponte dal partît, di tredis agns component dal Senedd e cuntune impuartante esperience professionâl tant che gjornalist.
◆ Il PC in Gales al va daûr de strade za cjapade di agns de bande dal SNP/PNA, ven a dî chê di cjapâ il puest dai Laburiscj tant che prin partît de Scozie, cuntune propueste politiche progressiste atente aes cuistions sociâls, ai dirits e aes dibisugnis de int e des comunitâts locâls. Cun cheste prospetive programatiche il SNP/NPA al à tornât a vinci in Scozie, daûr di une tradizion che e va dilunc zaromai dal 2007, e si conferme al guvier cul premier John Swinney, ae vuide di un esecutîf poiât da Verts.
◆ In Scozie e in Gales, dongje de afermazion dal SNP/PNA e di chê ancjemò plui rilevante dal PC e de dople legnade cjapade dal Labour, si palese, in maniere significative, la posizion, tant che secont partît, di Reform UK, l’erêt di chel UKIP, simpri vuidât di Nigel Farage, che al jere stât metût adun cun chê di sburtâ in direzion de Brexit. Chê fuarce politiche, protagoniste ancjemò di plui tes elezions aministrativis in Ingletiere, si pues calcolâle une sorte di trumpisim anglobritanic, populis, chauvinist e cuntune asse cuintri dai imigrâts forescj e di dut ce che nol è avonde inglês. In gjenerâl e à roseât un buine dose dai consens dai Conservadôrs e dai Laburiscj, ma in Scozie e in Gales chest nol è sucedût in misure compagne propit pe presince e pe ativitât di sogjets politics cul profîl dal SNP/PNA e dal PC.
◆ Par fâi cuintri ai nazionalisims dominants, conservadôrs e reazionaris a coventin progjets politics alternatîfs e progressiscj, espression sclete di teritoris e comunitâts. ❚