Cui soio jo pardabon? Cuale ise la mê identitât?

Domandis che a traviersin la filosofie, la psicologjie e fin la tecnologjie. Par une vore di timp, la identitât e à vût riflès pal plui suntun fîl ugnul che al compagnave la persone de nassite ae muart. In dì di vuê si è invezit sclarît il leam fuart tra lis carateristichis psicologjichis e fisichis personâls che si trasformin e che si rinfrescjin di un continui dulinvie la vite.
◆ La part plui profonde, autentiche e uniche di un individui si forme cu la nassite. O rivìn tal mont cun cuarp e temperament unics (no par altri, valevul ancje pai zimui omozigots). Cun chest tesaur o imparìn a reagjî aes cundizions ambientâls e a fâ esperiencis di vite. Dutun cul inscuelament e la socialitât a daran forme al nestri caratar. Lis inclinazions naturâls (istint, desideris, temperament) si mudaran inte condote (la etiche): normis morâls, no imponudis ma sieltis. Dì par dì o deventìn cussients di cui che o sin e de imagjin che chei altris a àn di nô. La identitât personâl si forme e cambie te reciprocitât, tal confront e sigûr mai tal isolament sociâl. Chê dai grancj no je plui stabile di chê de zoventût, ma dome e mude plui a planc e dispès mancul di buride.
◆ Fasint un confront cu la societât antighe, dulà che i rûi a jerin fers e za destinâts fin de nassite, la modernitât e à judât tant sedi te incressite che tes libertâts personâls.
◆ Fasìn un esempli. Vuê, la ave di une persone di cuarante agns e saveve ben cui che e jere; la sô identitât e jere clare come une fotografie, costante e ricognossibile dabon. Se al nevôt o ae gnece i ven domandât “Cui ti sintistu di jessi?” al capite che si fermin un moment a mastiâ. No che a sedin malsigûrs, anzit. Dome che a rifletin prin di sielzi ce rispuindi parcè che, di fat, a rivin a pandi tancj rûi su la fonde di suazis e situazions diferentis. E je une carateristiche de nature umane, che dut câs in dì di vuê e je incressude dai stîi di vite che a cambiin di un continui. Par di plui, come che o fasìn in tancj, al è deventât comun bacigâ sedi ambients fisics che virtuâi, vê identitâts disavuâls che si condizionin une cun chê altre.
◆ O sin simpri nô, ma cun musis e pinsîrs diviers. Rûts o mascarâts? Chei di simpri o in evoluzion? Coerents o in contradizion? Ancje se la mancjance di modei fers e pues puartâ al risi di lâ daûr des modis, la disinvolture tal sielzi e je une gnove pussibilitât pe cressite personâl. Al jude rindisi cont che la identitât no pues jessi un bloc di marmul sculpît, ma une forme che si plee daûr dal volê di ognidun. Une gnove libertât pe nestre vite tignint presint che l’obietîf dal disvilup personâl al puarte a cjatâ un puest inte societât cun responsabilitât sedi par noaltris che pal prossim.
◆ A trente agns, discuvierzi gnovis passions, a cincuante scomençâ une altre cariere di lavôr, a setante inventâsi un avignî no ordenari, e no dome par mantignî curiositât e interès pe vite. ❚