La bisugne di vê pardut segns dal om
Al è un sintiment che al è cul om di tant timp: la presunzion di jessi sore de Nature e di chei altris vivents. I antîcs Romans a disevin che “omnium animantium formam vincit hominis figura” (la figure umane je preferibile al aspiet di ogni altri animâl).
Chest al à incidût a fuart sul compuartament dal om e des sôs societâts e al à condizionât il rapuart cul ambient: clâr che chest al è riferibil aes societâts dal om urbanizât e tecnologjic e no a chês che a àn mantignût un rapuart diret cun la Nature.
In particolâr, dal secont dopovuere il cambiament de societât e des esigjencis des personis dutun cul aument de disponibilitât di bêçs e di timp libar al à puartât l’om, pocât ancje dal disvilup tecnologjic e informatic, a fâ deventâ la considerazion di se ancjemò plui grande di ce che e jere prin.
Chest lu à convint simpri di plui che cualsisedi ativitât che al fâs e sedi impuartante, che e puedi jessi fate tai mûts e lûcs che al calcole e che e vedi di jessi visibile in ogni mût e in ogni lûc.
A chest si è zontade la distance simpri plui grande dal mont naturâl, viodût tant che une robe lontane e, massime, tant che alc di doprâ pai propris bisugns.
Tes ultimis gjenerazions chest fenomen al è rivât a consecuencis inimagjinabilis fin pôc timp fa e che a colin tal inverisimil e tal ridicul tant che, come che si dîs dispès in Friûl, se a tornassin chei di une volte…
Par fâ cualchi esempli: fruts (ancje di mont e di zonis rurâls) che a àn pôre di jentrâ te jerbe, int che si môf tai ambients naturâi “vuidade” dal celulâr (e se si discjame la batarie o si piert il segnâl?) e des informazions che si cjatin sul web (in plui di un câs si è scugnût lâ a cirîju e salvâju, ancje cul risi pai socoridôrs), gjenitôrs che a slontanin i fîs dai prâts dulà che al cjante il Coiat (Crex crex) par pôre dal riclam scognossût de bestie. Chescj a son fats che le disin lungje su ce plete che à cjapât la societât.
Dut chest dutun cun altris aspiets a fasin pierdi al om il sens de vite e dal rispiet che si à di vê tai rapuarts cun chei altris e cul ambient.
A proposit di ambient: timp indaûr e je stade fate sù une opare sui Crets di Vile di Cjargne che e ven definide “terace panoramiche”. Prin i Crets di Vile si mostravin salvadis, ma il stimul a meti alc di uman e simiotâ ce che a fasin chei altris par no sintîsi di mancul al è stât evidentmentri masse fuart. Par solit, però, nol è copiât ce che fasin di bon chei altris, come par esempli iniziativis che a incressin la cognossince (che no vûl dî, che si badi ben, fâ manifestazions o fiestis, chei a son spetacui). In chest mût no progredissin culturalmentri ni lôr ni i lôr fîs, duncje no rivaran nancje in futûr a capî ce che a stan fasint ni a liberâsi de fisime di volê insoçâ dut cu la man dal om.
Cualchidun che nol à ni cognossince ni sensibilitât al podarès obietâ che si pues pensâ, intune sorte di parêt di cret, che al sedi un spudacj, ven a stâi une robe di pôc cont. In efiets al è un spudacj sedi come opare sedi come funzionalitât de stesse, ma provait a pensâ trop che si impâr un spudacj suntun vistît (massime sa al è neri). Par rindilu ancjemò plui evident, a vevin picjât parsore une bandiere taliane. Si varès di capî il sens: par dî che la “opare” e je stade fate in non de Italie? Sigûr e je stade fate cun bêçs publics.
Chest esempli al mostre che al è l’om, cul so segn pardut, che al vûl che al sedi l’ambient in funzion des sôs ativitâts e dai siei plasês. Daspò a rivaran scovacis parcè che, prin o dopo, cualchi cjastron lis butarà ancje jù di chê “terace panoramiche”. Chest al è un circul viziôs: si fâs rivâ personis intun puest e chel puest al devente simpri plui antropizât, simpri plui “sporc di om”. Ma se chest al continuarà (e sigûr a son ducj i segnâi che al sarà cussì), cemût si puedial pensâ ae conservazion de naturalitât, de biodiversitât e, in fin dai conts, dal stes om?
Ogni ocasion e je buine par meti un segn dal om: il pes picjât sul cret dongje de plêf di Cesclans che al è evident par cui che e rive te nestre mont di Sud su la autostrade o la bandiere taliane sul Dobis (mont parsore Cjanive di Tumieç) a son doi esemplis. Dutis dôs lis “realizazions” (vino di clamâlis “artistichis”?) a son stadis fatis in ocasion di manifestazions dal om ancje diferentis: ricreative la prime, celebrative la seconde. A varessin di jessi stadis provisoriis, invezit a son agns che a son stadis fatis. In cont dal “gust”, miôr no tratâlu in profonditât, ancje se al varès di jessi calcolât trist: a son doi elements artificiâi intun contest naturâl che, al è evident, a cualchidun i varan di plasê, ma che a causin impat, par es. puartant sostancis estraniis al ambient cuant che a (dis)pierdin tocs e a pesin su la funzionalitât dal ecosisteme. Tal câs de bandiere: al è plui impuartant vê un toc di materiâl artificiâl colorât (a pet dai colôrs e dal simbolisim: lu specifichi par evità coments fûr lûc, ancje se sigûr se i colôrs a fossin diviers la bandiere a sarès bielzà stade tirade vie), pluitost che un ambient naturâl. Chest le dîs lungje su chel che al sarà in futûr e su lis consecuencis.
A chest pont al bisugnarès domandâsi se chestis azions a varessin di lâ daûr di un permès e se a puedin jessi “permanentis”. Se la rispueste e je negative ae prime part de domande e positive ae seconde, provait a pensâ a ce che al sucedarès se cualsisedi idee di meti alc intun ambient naturâl e vignìs realizade. O saressin intun parc zûcs là che ducj a son costrets a viodi lis boiadis che a cualchidun al à vût iniment di fâ. Sigûr che par tancj che a vegnin des citâts o de plane, la mont e je è di considerâ un parc zûcs. Chi, però, no si trate dome di ce che i interesse a cualchidun, ma dal rapuart dal om cu la Nature. Se la rispueste e je positive ae prime part e negative ae seconde, si torne tal solit zîr: l’ent public che nol fâs ce che al à di fâ.
Par ultin une altre domande che ducj a varessin di fâsi: isal pussibil che no si puedi lassâ alc di salvadi e che a vedin di impestâ fûr dut cun cragnis dal om? Chi e jentre in zûc la debilece dal om che al à bisugne di viodi robis fatis di lui (ven a stâi la antropizazion) par sintîsi ben, par sintîsi sigûr. Che si pensi a cemût che al pues jessi calcolât il salvadi par esempli intun bosc: “… mi ritrovai per una selva oscura ché la diritta via era smarrita” cu la imagjin alegoriche de “selva oscura” dantescje te Divine Comedie che no lasse puest par sintiments positîfs. La “nature salvadie” e je considerade une robe che e confronte l’om, e che i fâs pierdi la olme. Cjalant i fats, però, in dì di vuê, la “selva oscura” e je rapresentade, plui che di un ambient naturâl, dai grebanos des citâts (dulà che e vîf plui de metât de popolazion umane mondiâl) e dal ingropament dal cjâf dal om che il stîl di vite citadin (comprendût l’ûs simpri plui slargjât de tecnologjie) a stan provocant. Chest “stîl” al è un tramai mentâl che al fâs colâ lis personis intun stât di convinzion no fondade in cont de realtât che al poche simpri plui l’om a calcolâ la Nature tant che alc di sô proprietât. Se, però, si fevele di “proprietât” (sigûr in mût impropri parcè che la cuistion, tratantsi di biologjie, e je une vore plui complicade) nol è di sigûr l’om a vêle. ❚
