5. Di Madone di Mont a Masaruelis. Sot de ploie su lis olmis di Pauli Diacun fin ae fontane dal leon in chebe

O sin ai 23 di Setembar dal 2025. Cuinte tape dal Troi di Aquilee (o Troi Celest) di Madone di Mont a Masaruelis. Simpri cu la mê femine Emanuela e nestre fie Mara. Un tape lungje (a saressin 26 km ma nô o vin fats 29 km), dure pai disnivei e sot de ploie fuarte tai ultins 10 km.
◆ O partìn aes 6 e mieze dal Trivio, l’albierc che al è a un par di chilometris di Madone di Mont viers di Jainiç, li che o vevin durmît e cenât nossere une vore ben. Il lûc al è panoramic, o sin dongje dal confin sul Judri e la Slovenie, ma al è ancjemò scûr e si vualmin dome lis lusignis dai paisuts des valadis de Sclavanie. Nus tocje tornâ a montâ sù fin al Santuari su la strade jenfri il bosc nereôs e un pôc signestri cu lis pilis impiadis. Rivâts tal plaçâl che al criche il dì, o lin jù in direzion di Puriessim, prime pe strade asfaltade par uns doi tornants, po dopo par une strade viere di glerie dute tal bosc, simpri rive injù. E veve di jessi stade une biele strade, furnide di cunete e colonei, ma dal dut bandonade. Il disnivel al e fuart, a dilunc simpri rive injù, che al strache i zenoi e che, ma mi inacuarzarai dome usgnot, mi fasarà vignî nere la ongule dal poleâr dal pît.
◆ A Puriessim o passìn denant de glesie. O sperìn di cjatâ une ostarie vierte parcè che o jerin partîts cence gulizion, ma nuie, dut sierât. Tressade la strade asfaltade, o lin daûr dal pessut celest che nus mene par une stradele blancje paralele al Nadison. Ogni un cuant la cise a ôr dal flum si vierç e o rivìn a viodi la aghe colôr smeralt che fin cumò o rivavin dome a sintî murmuiâ. Rivâts a Cividât o vin sperance di meti alc in bocje. O passìn il Puint dal diaul, dopo di vê fate la foto di tradizion, e si plombìn tal for di Catarossi, cui miôr strucui che o cognòs, che nus bonin la fam. Dopo o jentrìn tal domo. Nol è timp par viodi dut ma almancul une cjalade ae innomenade pale di aur fate fâ, tor il 1200, dal patriarcje Pelegrin. O marchi la particolaritât di vê lis scritis fatis cun pontarûi a stamp, letare par letare, come une anticipazion de stampe di Gutenberg ma doi secui e mieç prime. “Ma cjalait achì – o zonti – sot dai pîts de Madone si à fat meti ancje lui, in piçul e in zenoglon, cu la scrite PELEGRINUS II PATRIARCHA – MATER DEI MISERERE MEI, ven a stâi – o volti – Pelegrin II patriarcje – Mari di Diu ve dûl di me.”
◆ Si sin intardâts e o vin di lâ. O stici di spesseâ. Rivâts in place Pauli Diacun (o place des feminis), l’antîc forum de Cividât romane, Emanuela e implore: “O vin mangjât, vere, ma un cafetut achì, tal Cafè Langobart… no podaressino cjolilu?” “Sino pelegrins – o obieti – o turiscj?” Ma, dôs feminis cuintri un om, mi tocje rindimi. Cussì si sentìn fûr, su lis cjadreis di venc, cun trê capucins e o fasìn une biele polse, sot dai voi di chei turiscj curiôs o citadins elegants che a cjalin chei trê fûr di puest cul russac e il baston.
◆ Biadelore si inviìn sù pe strade asfaltade dal Cjistiel fin fûr des ultimis cjasis. Passât il ristorant o cjapìn la Strade di Crete e dopo o cjapìn a drete une viere strade militâr. E je pal plui pedrade, dute dentri dal bosc. E monte sù cun costance in direzion di Spinon. E je lungje che no finìs mai, plui o mancul 11 chilometris, a mieze cueste, simpri rive insù ma bielone. O sin dentri di un bosc une vore vieri e alt. Il cîl e è nulât e lis prevision a metin ploie. Ogni un cuant e je une beorcje. Une e mene a Sanguarç a drete, une altre, simpri a drete, a Vernàs. Nô o lin dilunc pe strade cuvierte des fueis rossis dai faiârs. Un spetacul! Une maravee di colôrs, tant che un tapêt persian. Un tapêt che però al imbroie i pîts parcè che al plate lis busis e lis pieris gruessis e nus fâs inçopedâ.
◆ A metât di cheste strade al tache a gotâ, prime cualchi gote planc a planc, po a plovisignâ, ancje sot dal bosc alt. O fasìn svelts une polse par mangjâ un pagnut sentâts suntun grant cjastinâr sglovât. La ploie e incrès. Il cîl si fâs neri, o spesseìn a cjaminâ, a sotet dai arbui alts. Ma dopo, juste là che il bosc al è plui râr, e tache a vignî jù a selis. Mancumâl che le vevin nasade e o vin lis mantelinis par parâsi. E je la prime volte che, su chest troi, o cjatìn ploie. Al plûf, al plûf fis e ancjemò al plûf! Ce vino di fâ? Lamentâsi e bruntulâ? Alore al jere miôr stâ cjase! La vite – o pensi dentri di me – e je ancje cuistion di sieltis. La sielte di vê miôr la cuvierte grise dal cîl o vê miôr la cuviertute dal sofà. O sin dut câs parâts des mantelinis e no vin pinsîr. O sin parâts de ploie, vere, ma i pîts a cjaminin intune strade che si è trasformade intun riul. Ogni buse sot dal fueam e je une poce, de bande de mont ogni tant al burìs fûr une pissande che e inaghe la strade. Nancje dî che o vin pîts e cjalcjuts strafonts e che il Gore-Tex des scarpis, la innomenade membrana sintetica in politetrafluoroetilene espanso vendude par jessi impermeabile, antivento e traspirante, no passe la prove sul cjamp, o miôr, tal bosc plomp.
◆ A son ancjemò beorcjis, a çampe par Torean e par Cueste di Sofumberc, a drete par Spinon e Tarcete. Si rive inte creste de mont, la strade e devente asfaltade, cence protezion dai arbui e, ae ploie, si zonte aiar fuart. No vin ripâr. Si cjape dut ce che al ven. Al tache juste un sploion di fâ fature a lâ indenant.
Si cjalìn tai voi e si inacuarzìn che, invezit di jessi preocupâts, o sin ducj contents, cun muse di ridi.
◆ I colôrs a son plui biei e odôrs de nature si nasin miôr. Chel bonodôr dolç e fin che si sint tal aiar cuant che al plûf nus mene a revocâ chel timp de nestre vite cuant che o jerin tal cjalt e tal sigûr. E il sunôr des gotis che a cisichin nus involuce e nus cuiete. Ce esperience biele! Sot de ploie che Diu le mande o ridìn contents come razutis tal sfuei. Cjaminâ sot de ploie no dome al lave la muse ma ancje al nete il cjâf di ogni pinsîr.
◆ O sin rivâts a Masaruelis aes 3 e mieze dopomisdì, avonde bagnâts. Tal paisut no si viodeve anime vive, come che no vin mai cjatât nissun vie pal troi, di Cividât fin achì. No, o ai falât. O vin cjatât une vacje, dôs cjavris e un mus intun sierai.
A Masaruelis o vin bevût ae fontane dal leon in chebe. Si clame cussì parcè che parsore e je une biele statue di un leon sierât dentri di une chebe di fier. La tabele e spieghe parcè. Chei di Masaruelis a vevin la ole par aurî aghe lontane dal paîs. A domandavin ai sorestants di tirâ la aghe in paîs ma chei a fasevin i cucs. Stufâts, i abitants si son fats la fontane di bessôi e, par coionâ i sorestants, a àn metût la statue dal leon che ju rapresente, ma impresonât dentri di une chebe.
◆ La glesie di Masaruelis e jere vierte. Cussì, bagnâts strafonts, o vin podût impiâ une cjandele e ringraciâ il Signôr de biele cjaminade umide e de salût che o vin par rivâ a fâle. Ae fin il muini, une vore zentîl, nus à metût il timbri su la credenziâl. ❚
[Tal numar che al ven la tape di Masaruelis a Montmaiôr di Taipane]