Pai nestris Fogolârs

O sin ducj dâur a discuti su cemût che il Friûl al à memoreât l’inovâl dai 6 di Mai dal 1976. Ma al è un Friûl fûr dal Friûl, che al sint il taramot di 50 agns indaûr come e plui di ce che al sucêt achì di nô. E je la Patrie dai nestris Fogolârs, un Friûl inaltrò che in chê volte al à puartât jutori cence padin e che cumò, tal moment dal ricuart, i ten a celebrâ chei events come la testemoneance plui biele di ce che e je la nestre identitât di popul.
◆ Tes ultimis setemanis mi è capitât di assisti a trê esemplis di chest afiet pes lidrîs che ogni volte mi colpìs e mi rint ancjemò plui braurôs pal leam une vore strent cul Friûl che cheste int e ten vîf. A Trent, il Fogolâr vuidât dal architet Sandro Aita al à animade ai 9 di Mai une cunvigne a Palaç Geremia: a son rivâts ancje il sindic Franco Ianeselli, la assessore Gianna Frizzera e il dirigjent dal Dipartiment di Protezion Civîl de Provincie autonome Stefano Fait.
◆ Un dai moments plui biei al è stât chel de rievocazion de grande amicizie dai trentins che si son autotassâts (come i dipendents de Cavit), o si son mobilitâts cu lis lôr struturis: de Caritas ai scouts, des Pro Loco ai pompîrs. E soredut i alpins congjedâts de ANA, che a cjâf a vevin propit un trentin: Franco Bertagnolli. Tancj esemplis di solidarietât a son stâts memoreâts di Asterio Frachetti (ANA), Gabriele Paris (Caritas), don Fabrizio Tomasini (scouts), Grazia Merlo e Roberto Ferrari (pompîrs) che a son rivâts in chei mês a Cergneu, Buie e Dartigne: e par sierâ l’incuintri Loredana Picco, anime dal Fogolâr, e à contât la “corse” di tancj emigrants viers de lôr Patrie feride.
◆ A Lugano la Zampa Foundation, animade dal manager di divignince furlane Claudio Zampa, e à inmaneât un moment comemoratîf straordenari ai 16 di Mai al Consolât talian te sale dedicade a Carlo Cattaneo, otignude in gracie de disponibilitât dal consul Uberto Vanni d’Archirafi. Sul palc si è esibide la brave arpiste di Glemone Emanuela Battigelli e po Gino Driussi, gjornalist di divignince furlane che al è stât par agnorums une des vôs plui scoltadis de Radio svuizare, al à intervistât l’ambassadôr Bernardino Regazzoni, che al veve sô mari di Sante Marie di Sclaunic, in Comun di Listize: Regazzoni al à memoreât il grant jutori dai svuizars e soredut dai ticinês. Significative ancje la presince di un furlan di ecezion come Fabio Capello, che nol mancje mai di pandi la braùre des sôs lidrîs.
◆ Ai 6 di Mai ancje il Fogolâr di Gjinevre, vuidât de sô zovine presidente Agnese Trevisan, al à clamât dongje ae Maison Internationale des Associations un gjeofisic e un gjeochimic, Matteo Lupi e Massimo Chiaradia (che al insegne ae Universitât di Gjinevre), moderâts dal gjornalist Emiliano Feresin, a resonâ su “ce che al è sucedût e ce che o vin imparât”. E la platee, plene di furlans che a fasin ricercje e imprese in Svuizare, e à puartât ancje un contribût di memorie di bande dai tancj che in chê volte a levin indenant e indaûr de Svuizare al Friûl.
◆ O podaressin lâ indenant citant esemplis come il Fogolâr furlan di Limbiate, dongje Milan, là che Dree Venier al à presentât “Di scjas in scjas”, il libri che al à curât pe “Patrie” metint dongje i articui di Agnul Floramo su la storie dai taramots in Friûl. O di chel di Milan, che al à inmaneade une zornade clamade “Il Friûl al ringracie Milan e la Lombardie”, cun ospits impuartants e intervents di gale.
◆ A cjalâ ce che i furlans di inaltrò a fasin par tignî vive la lôr identitât al ven cuasi di invidiâju. In Patrie vuê a son tancj chei che si rindin ae logjiche dal “Io sono Friuli Venezia Giulia”, o che pardabon no rifletin nancje un lamp su cui che a son e di dulà che a vegnin. Par chest, forsit, al coventarès vierzi i Fogolârs ancje chi di nô, par che a sedin une lûs che e dedi cussience e sperance par ducj chei che a vuelin ancjemò dîsi furlans. ❚