COROT PAR PRE TONIN CJAPIELÂR (1940-2026)
Tonin, cjâr amì, o miôr, cjâr fradi, tu nus âs lassâts cussì di corse che o sin ducj restâts sconsortâts.
◆ In chescj dîs tal gno cjâf mi son passâts di un continui come tun film ducj i agns che o vin passât insiemi. Scomençant dai prins agns ’70 che si cjatavin ogni lunis cuntun trop di predis a Vasinis cun pre Pauli e po, dopo dal taramot, li di te, stant che la cjase dulà che tu jeris a stâ cun tô mari Irme a Glemone e jere restade impins.
◆ Ocasions splendidis par cjatâsi a preâ, confrontâsi, sbrocâsi, solevâsi, discuti, e ancje a fâ cualchi biele ridade liberant e po ripartî cun plui passion e vigôr. A son stâts agns fondamentâi che nus àn judâts ducj nô a tignîsi sù l’un cul altri e a fâ miôr i predis cu la nestre int.
◆ Dai agns ’80 par passe 30 agns si cjatavin ogni dì a mangjâ insiemi a Ruvigne cun Rose prime e cun Bruna dopo. Ocasions par fevelâsi, confrontâsi, confidâsi, judâsi, progjetâ e ancje lavorâ. Dute la Bibie tacade di pre Checo e puartade indenant di pre Antoni, de edizion Ribis prime e de Diocesi dopo, le vin passade fûr par fûr plui voltis, e compagn cul Messâl. Simpri cul fin di dâ ae nestre Glesie i struments pe preiere te nestre lenghe, par rindi tant la peraule di Diu che la liturgjie cul savôr plui familiâr e plui incjarnadis te vite des nestris comunitâts. E lu vin fat cun passion e cul gust di puartâ indenant voris che o ritignivin impuartantis, necessariis pes Glesiis in Friûl.
Se nol jere chest grup, spes criticât e cjalât cun suspiet, sigûr no varessin la Bibie par furlan e nol sarès mai nassût il Messâl.
◆ Tonin, ancje a ti come a pre Checo, pre Antoni, pre ‘Sef e altris, tant che Mosè che al veve compagnât il popul viers le tiere prometude e nol è rivât a jentrâ, ma dome a cjalâle di lontan, cussì nancje a voaltris, cun tant che o vês fat, no sês rivâts a cjapâ in man il Messâl. Lu stin spietant ancjemò. Cuissà se mi tocjarà ancje a mi il stes destin.
Ancje in chescj ultins agns si sintivin dispès par confidâsi i nestris pinsîrs e par condividi ce che o stevin fasint.
◆ Tonin, tu sês lât cussì di corse che no vin podût nancje stâti dongje intai ultins moments di vite.
◆ Graciis, Tonin, de tô amicizie sclete, de tô umanitât gjenuine, de tô passion pal Vanzeli, pe int, pe comunitât cristiane, pal impegn in Glesie Furlane, graciis de tô sapience, de tô sensibilitât par cui che al veve plui dibisugne: malâts, anzians, disabii. No si pues dismenteâ che a Pignan tu âs fondât insiemi cun Sergio il Samaritan par dâur bon acet, afiet e sigurece ai disabii e par che a podessin sintîsi come in famee.
Tu nus lassis une biele ereditât di vite, di sapience, di fede, di amôr pal popul furlan e pal popul di Diu.
Mandi, mandi, Tonin, sta cun Diu e pree ancje tu par nô. ❚
