Pordenon, dulà che si respire aiar alessandrin, mighe roman…

I nsome Pordenon di ce bande staial? Di ca o di là… de Italie? Ben, la domande e je legjitime. La rispueste e podarès dâi fastidi a plui di cualchidun, massime in timps là che ciertis apartignincis a puedin ancje valê une candidature che e puartarà beçons, autoritât, bandierutis, corsis di bersalîrs e polentis di alpins. E pûr la Storie nus conte dut. Al baste dome rivâ a cjapâsi il timp just par scoltâle. E – magari cussì no! – no fâ fente di no vêle capide. Come che si varà capît, il compit di cheste rubricute al è chel di cirî elements che nus confermin il gust dal contrari. E alore “tachebande”. No saraial mighe un câs che la catidre dal vescul di Pordenon e sedi dedicade a Sant Marc, no? E che il Domo de citât al puarti duncje il non dal Evangjelist che si crôt che al vedi batiade la semence cristiane in chestis nestris bandis estremis, che si slungjin pal alt bacin dal Adriatic e che a cjalin a Orient e a Setentrion, plui che no a Sud e a Ovest. Al Baltic e al Mâr Neri.
◆ Volint glossâ i studis benemerits di Guglielmo Biasutti, di Gilberto Pressacco e di chei che a àn tirât daûr di lôr, a Pordenon si respire aiar alessandrin, mighe roman. Cun buine pâs di chei che si prontin a celebrâ i vants de italianitât di cheste rinovade capitâl de Culture dal “Bel Paese ove il Sì sona”, la evidence de alteritât di cheste tiere rispiet aes sortis talianis (ben pôc progressivis, tai ultins timps) e je aromai clare. I studiôs a son sigûrs che la prime “Plebs”, ven a stâi la comunitât cristiane des origjinis, si cjatàs a Tor, sot de protezion dai sants Elar e Tizian, di clare fonde aquileiese. La cressite de citât sul puart dal Nunciel (Portus Naonis, che al varès dât il non ae citât) e à puartât po dopo a une ricodificazion de topografie dal sacri, ma simpri tal rispiet des tradizions antighis. Dal altâr, culì, si predicjavin Origjen e Rufin, no Pauli di Tars. Il popul dai fedêi al vignive inscuelât inte convinzion che, ae fin dal Timp, il Crist, lât jù tai Infiers, al varès liberât ducj, adiriture il Demoni, crodint che se Diu al esist al è un Diu di Amôr. E se al è un Diu di Amôr, al è un Diu che al perdone. E se nol perdone, nol pues di sigûr jessi Diu. Ce maravee, no mo? Par fuarce Rome le definive une eresie! Di un pont di viste de devozion, par dut culì e stralûs la lûs di Aquilee.
◆ La stesse diocesi di Concuardie si declarave cun supierbie sô fie, jessint stade fondade tal 389 d.d.C. di Sant Cromazi. Par dut, sot des aulis des glesiis di dute la diocesi, al rivocave duncje il rît patriarchin, resistint in maniere uficiâl fin al 1570, cuant che par pressions rivadis fûr dal Concili di Trent al fo sostituît cul rît roman. Clâr, cu la complicitât ancje di Vignesie, che tancj dams e à fat – e lu savìn ben! – no dome par disfâ il Patriarcjât dal pont di viste politic e teritoriâl, ma e à robât ancje il Sant di riferiment, trasferintlu dai flâts salubris des Prealps jù inte tiere malsestade de Lagune. Tai calendaris liturgjics e intes dedicazions dai altârs di dute la Diocesi si lein i nons di Macôr, Fortunât, Donât, Secondian, Romul e ducj chei altris martars che a son invocâts dulà che la lûs di Aquilee e à parât vie la scuretat spirituâl. Pordenon, duncje, al è plui dongje des valadis de Drau e de Save che no de sacralitât presumude de Plâf! Nol baste. I codiçs liturgjics, i messâi, i calendaris conservâts tes cartelis dal Archivi dal Cjapitul dal Domo di Pordenon e in chei dal Archivi de Curie Vescovîl a son cence dubis riferîts ae liturgjie antighe aquileiese, testemoneance des tantis orazions dedicadis a sants e martars che no àn nuie a ce fâ cul rît roman. Une curiositât di grant interès culturâl: al pâr che il cjant patriarchin si sedi conservât tal Friûl ocidentâl plui a dilunc che in altris bandis dal Friûl, fûr che in Cjargne: vôs di chestis melodiis, di fat, a son sorevivudis par secui tes parochiis plui isoladis de diocesi, soredut in chês de mont, inte Valade de Ciline o inte Val Colvare, sot forme di tradizions orâls dai cjantôrs locâi, prime di jessi deponudis par simpri. Cussì i cjants de Passion (compagn dal Miserere o dal Stabat Mater) a àn mantignût culì, fra lis andronis antighis di clap che si strenzin aes cuestis di jerbe de mont, melodiis dal dut origjinâls che no àn riscuintri in nissun messâl roman.
◆ A jerin esecuzions plenis di un sens tragjic e ancestrâl, dispès leadis aes rapresentazions sacris, come la famose procession dal Vinars Sant di Nert, batiade dal rituâl sunôr dai “Tamburins”, cognossude ancje come la passion dai “Cagnudèi”: che nol è un câs al vueli dî i judeus. Che al sedi un riferiment a chei ebreus Alessandrins che si fevele tant in merit ae tradizion patriarchine? Nol baste: interessant al è ancje un resonament sul Ufici dai Muarts.
◆ La preiere e jere il cûr de vite sociâl des valadis. I acents doprâts pai salms di là da la Aghe a son stâts ogjet di studis etnomusicologjics propit par vie che a conservin “celulis melodichis” antigonis, che sigûr a vegnin dai prins secui dal Cristianisim aquileiês, come che e à mostrât ben Paola Barzan, une des massimis espertis di musiche de tradizion orâl che si ocupe ancje di cemût che il patrimoni al vegni tramandât tes comunitâts cence l’ûs de scriture. Ultime zoie? Il riferiment a Aquilee al è fondamentâl par capî la nobiltât storiche e la difusion dal cognon Ciriani in Friûl. Che cun Pordenon, ancje dal pont di viste politic, al à tancj elements di contat. Ancje se in dì di vuê al è associât soredut ae zone di Pordenon e Spilimberc, il leam cu la antighe metropoli dal Patriarcjât al è sigûr e increditât e peât dal pont di viste storic aes dinamichis dal Patriarcjât di Aquilee. Tantis fameis cun chest non a fasevin part de classe aministrative, dai nodârs o de piçule nobiltât che e zirave ator des istituzions de Glesie e civîls de regjon. Il non “Ciriano” (di dulà che al ven il cognon che al sune nuie mancul che in Parlament) al jere difondût in epoche paleocristiane e alt medievâl propit par vie dal lustri di Aquilee come centri di difusion dal cristianisim tal Adriatic. Dopo dut, tai stes mosaics de Basiliche e ven dade une testemoneance straordenarie cun chê iscrizion tant innomenade “Cyriace vibas”, une des espressions e evidencis epigrafichis plui bielis che a metin in conession drete il cognon “Ciriani” ae vite di ogni dì e ancje a chê spirituâl de antighe metropoli. La iscrizion e je palindrome, e pant un significât tant in lenghe greghe che in lenghe latine. E je espression di bon auspici. Si augure di vivi a lunc, ma inte lûs de Veretât.
◆ Cuissà se chei che a puartin chest significât profont e bielissim tal lôr cognon a son al nivel di une responsabilitât tant grande? ❚