Cui e parcè lavoravial sot vie
par mantignîlu sotan e disputabil?
Cuant che, dopo la vuere, si discuteve par meti adun la Regjon e si de acet a chê “mâl nassude”, no forin malapaiâts dome i furlans: ancje i triestins no le cjaparin ben. Cualchidun di lôr, viodint che i furlans a jerin tancj e lôr mancul de metât, al pensà di proponi che tes elezions ogni vôt di un triestin al valès par doi. Chê robe li dal sigûr no si fasè. Ancje di là de Livence si cjalave no masse contents ae gnove Regjon, parcè che e vignive a mancjâ la otave provincie dal grant Venit che plui di cualchidun si veve insumiât. Ce fâ inalore? – a pensarin a Triest e a Vignesie. E ve ca che lis dôs – che no si jerin mai voludis ben – si cjatarin dacuardi: bisugnave spartî il Friûl. La prime par rindilu debil e mantignîlu sotan; la seconde par sotanâlu intune altre maniere e, magari, dantji une altre smorseade, dopo di chê di Napoleon tal mandament di Puart.
◆ Fat il ‘68 (la Provincie di Pordenon), Triest e Vignesie a “faserin un ‘48” (cidin). Cussì, intant che Gurize e vignive cjapade di pet di Triest, il Friûl di soreli amont al fo strent te smuarse des dôs citâts di mâr. La vît e vignì sù strente biel plancut sul imprin e po cun fuarce, cuant che il puar Melzi al ricuardà il Friûl storic. In chê volte si scjadenarin soredut sui gjornâi, come che o ai scrit la volte passade. Di dut ce che o vin passât, chei cuatri che o faserin cuintri, al merte che us conti une che je pardabon biele e che e pant ce fate di gjornâi e gjornaliscj che o vin. In curt: cuant che al jesseve un articul che al faseve patùs dal Friûl, dal furlan e dai furlans, nô o rispuindevin; dopo dîs e dîs (ma no simpri) la letare e vignive publicade (ma simpri çoncjade e strapassade); il dì dopo, pronte la rispueste di un letôr. Une volte, chest cantin mi tocjà a mi. Lete la rispueste, disgustât o butai il gjornâl te cassele des cjartatis. Però, al jere alc che mi sunave mâl. O tornai a cjoli il gjornâl cu la rispueste e ancje chel là che e jere publicade la mê letare e, tornant a lei, o restai scaturît: un “letôr” al veve rispuindût ancje a chê part de mê letare che no jere stade publicade! Cussì o vin scuviert che chel “galanton di Purcie” che nus rispuindeve bot e sclop al jere, in efiets, un dai redatôrs dal “gjornâl di Pordenon”.
◆ Par onestât mi tocje dî che si sin cjapâts ancje cualchi sodisfazion e une rivincite grandone cuant che, une dì, il diretôr dal gjornâl di Vignesie al scrivè une tirade di chês su la etiche dal gjornalist. In chel dì stes la edizion di Pordenon nus strapassà un nestri scrit, ma tant malementri che si viodeve che al jere fat di pueste e che nol jere un refûs. O scrivìn a Vignesie: “Che al viodi diretôr, lui al scrîf de etiche dai gjornaliscj e, inalore, che al viodi ce che fasin i siei colaboradôrs di Pordenon”. Mancul di une setemane e il cjâf redatôr di chenti al à vude çoncjade la cariere. ❚
