Dai 5 di Març la seste edizion de rassegne che
e met in rêt lûcs iconics tra art, musiche e storie
Nol jere furlan ma a Udin al à lassât oparis mestris e tra lis plui maraveosis de sô produzion. Inte Catedrâl i frescs de Capele dal Santissim Sacrament, cui agnui cjantôrs e senis biblichis come il Sium di Abram e il Sacrifici di Isac, lis palis cu la Resurezion di Crist, i Sants Ermacore e Fortunât e la Trinitât. Tal Palaç Patriarcjâl, l’Arcagnul Michêl che al pare vie i agnui ribei, lis Storiis dai Patriarcjis, il Judizi di Salomon e i profetis. Tal Oratori de Puritât, la pale de Imaculade e i frescs dal sufit cu la Assunzion de Madone e la Glorie dai agnui, invezit dal fi Zuan Domeni a son i vot monocromis des parêts laterâls cun episodis biblics e evangjelics. Inte Galarie di art antighe dai Museus Civics, l’Agnul custodi e Sant Francesc di Sales, la Alegorie de Virtût e de Nobiltât che a trionfin su la ignorance.
◆ Lui al è Zuan Batiste Tiepolo, e a lui e a so fi al è dedicât il “Festival dai Tiepolo e dal Sietcent in Europe”. Rivât ae seste edizion, al è organizât de associazion furlane “Itineraria” in colaborazion cun impuartantis realtâts furlanis, talianis e forestis, come la Regjon Friûl-Vignesie Julie, la Julius-Maximilians-Universität di Würzburg e la Franklin University de Svuizare. Dai 5 di Març e par dut il mês, inte prime part de rassegne che e larà indenant ancje in Mai, Setembar e Otubar, un program multidissiplinâr vivarôs al metarà insiemi ricercje, divulgazion, istruzion e economie tocjant i cjamps de art, musiche, artesanât, enogastronomie e dal turisim culturâl. La storiche de art, presidente e diretore artistiche di Itineraria, Maria Paola Frattolin, i ten a dî che «Il grant mestri venezian al jere stât clamât a Udin intun moment critic de storie dal Friûl, cuant che si dibateve su la scancelazion dal Patriarcjât di Aquilee, lassant in Friûl oparis che a son tra lis sôs plui significativis. A partî di Udin, il program dai events di cheste gnove edizion si slargjarà intes provinciis di Gurize, Pordenon e Triest, là che tal Museu Sartorio a son conservâts dissens dai Tiepolo, lûcs testemonis di une culture dal Sietcent iluminade, buine di fondi la bielece cu la sience, i scambis culturâi cul cumierç». Dongje dai Tiepolo si darà splendôr a altris grancj rapresentants de art di chel timp, come Dorigny, Torretti, Novelli, Morelli, Urbani, onorant in musiche Vivaldi, Tartini e Mozart tai 270 agns de sô nassite, discutint dongje di impuartantis fameis come i Manins e i Coronini.
◆ Concierts, cunvignis, incuintris di storie, art e altris iniziativis multidissiplinârs a viodaran ospits preseâts studiôs, formazions musicâls ecelentis e esperts clamâts a frescjâ cuntune largje palete di colôrs e prospetivis chel che al è stât un secul di aur tai cjamps dal savê, une epoche iluminade cun dutis lis turbolentis vicendis storichis che le àn traviersade.
◆ Il festival si inaugure ai 5 di Març aes 8 di sere intal Salon dal Parlament furlan dal Cjistiel di Udin, cul conciert de Orchestre di Arcs dal Conservatori Tartini di Triest inte esecuzion di pagjinis sieltis di Mozart, Tartini e Vivaldi. Sabide ai 7, tal Palaç Antonini Belgrât di Udin, des 9.30 si tignarà la cunvigne “Tra lizerece e gravitât al timp dai Tiepolo”, cun in viertidure un intervent dal atôr e regjist Giorgio Monte, e a seguî aprofondiments cun Flavia Saba dal conservatori triestin, Johanna Fassl de Franklin University, il studiôs Andrea Piai, Massimo Degrassi de Universitât di Triest, Luca Baroni de Universitât Ca’ Foscari di Vignesie e de diretore artistiche Maria Paola Frattolin. Domenie ai 8 di Març, aes 10.00 a Palaç Piccolomini a Cordovât, si screarà la schirie di “Incuintris di Storie e di Art” cun “Il disvilup tal Sietcent dal cjistiel e il Palaç dai conts Freschi Piccolomini”. Inte stesse zornade, aes 3 dopomisdì, si fasarà l’incuintri ae Biblioteche dal Seminari Diocesan di Pordenon su la storie de prestigjose istituzion. Po dopo altris apontaments a Udin, S. Vît dal Tiliment, Triest, Cormons, Gurize e Gardiscje.
◆ Tornant ae musiche, sabide ai 14 di Març aes 6 inte Glesie de Presentazion di Marie tal Templi inte Cjase des Vedranis a Udin, si varà la esecuzion integrâl dai “Cuartets par flaut e arcs” di Mozart cu l’insiemi Artemisia Classica. L’apontament al viodarà la partecipazion dai students dai istitûts “D’Aronco” di Glemone, “Ceconi” di Udin e “Cossar” di Gurize, protagoniscj dal progjet promovût di Itineraria pe formazion sul costum dal Sietcent tal segn de tradizion e de inovazion. I costums, creâts e metût sù dai students pal festival, si podaran amirâ in mostre fint ai 20 di Mai, esponûts tal istitût scolastic glemonàs.
◆ Moment culminant dai events di Març, vinars ai 27 aes 8.30 di sere inte Catedrâl di Udin, e sarà la esecuzion de opare mestre dal divin salisburghês, il “Requiem in re minôr” K 626, cul Côr dal Friûl-Vignesie Julie, soliscj di ecezion e la FVG Orchestra. Par cognossi intal detai ducj i apontaments, il consei al è chel di consultâ il sît itinerariafvg.it. ❚
