Desideris musicâi pal an a pene scomençât: la musiche furlane e merete di plui

Volint esprimi cualchi desideri in cont de musiche furlane, un bon auspici seti par chel che al tocje la storie passade de nestre musiche, sedi par chel che al è il so presint che il so futûr, no mi mancjin ideis di esprimi su chest pont.
◆ Se ancje l’an che al è a pene passât nus à dât mût di podê cognossi o aprofondî autôrs che a rapresentin cjapitui significatîfs di chel che al è il patrimoni musicâl furlan, si podeve fâ di plui e di miôr, alore l’an a pene tacât nus ufrìs la pussibilitât di scandaiâ e pandi la musiche dai nestris vons. O feveli di chei musiciscj, compositôrs, promotôrs, mestris e diretôrs che a son masse dispès ereditât di esperts e cultôrs, e che si podaressin presentâ in clâf plui divulgative e vierte, cence dut câs sminuî il valôr des lôr creazions, des lôr vitis e des lôr ativitâts. Cence gjavâ pês ae impuartance dal lôr operât, si podarès slizerî la maniere di fâju cognossi, cun progjets bogns di mediâ culture specifiche, di setôr, e divulgazion vierte ai “profans”, cun sensibilitât particolâr pai students e in gjenerâl pes gnovis gjenerazions. Propit su chest, a scuele si fâs avonde pôc, gjave i cjants di Nadâl par furlan, chei de tradizion popolâr, intai pôcs câs dulà che mestris e professôrs si dedichin a rangjâ par frutins e fantats cjants come “Lusive la lune”, “Jesù cjamin”, par dî, o a voltâ par furlan chês famosis cjançons internazionâls che a àn ancje stufât. Se ai miei timps, e no soi masse vecjo, aes elementârs e aes mediis cualchi bon insegnant nus faseve inmò cognossi bielis vilotis, che in chê volte si veve inmò la fortune di sintîlis intes ostariis, tes serenadis e intes fiestis di paîs, cumò o sint plui di cualchi gjenitôr che si lagne parcè che chestis robis a scuele no si fasin plui. Nuie di nostalgjic, al mancjarès altri, ma la lenghe furlane ancje inte musiche si pues doprâle in clâf cetant inovative, inmò miôr doprant i gnûfs sistemis tecnologjics, midiant di chel imprest che o vin simpri in man, il telefonut, o il tablet, o il computer, o lis benedetis lavagnis digjitâls che a ufrissin il non plus ultra in chest cjamp, cjapant dentri l’auto-tune. Si podarès ancje rivisitâ i cjants di Aquilee in clâf rap, trap o ce altri, e magari contaminâju, tal sens bon, cu la ande des tindincis dal moment che la zoventût e cognòs miôr di ducj e che e inove di un continui. E chest al è dome un esempli. Tant al vâl ancje par chel che al tocje la programazion conciertistiche, no dome di bande des corâls, che soredut lôr a van indenant a fâ un grant lavôr di divulgazion dal nestri patrimoni, ma al coventarès che ancje i cartelons dai teatris blasonâts e i centris di produzion furlans a metessin dentri dai calendaris des lôr stagjons i lavôrs plui lodevui dai nestris autôrs, passâts e presints, eseguîts di grandis orchestris e côrs. Cussì che un Tomadini, juste par fâ un non, nol sfiguri dongje di un Liszt dentri di un conciert a teme, compositôrs che tra l’altri si stimavin a vicende, tant che a son un pâr di letaris che si erin scrits, a testemoneâlu. E ancje chest al è dome un esempli, tra i tancj che si puedin fâ.
◆ Tal merit des produzions atuâls, o vin une gnove gjenerazions di cjantautôrs, tant inte musiche “popolâr”, tal sens di “pop” a la inglese, come Massimo Silverio, Nicole Coceancig, Alvise Nodale, che a àn plui fortune ator pe Italie che chi di nô, e compositôrs furlans come Alessio Domini e Maria Beatrice Orlando, che no ricevin il spazi che a meretin, gjavant cualchi râr câs di ricognossiment. Par fâle curte. Se inmò cumò si discut se e esist o no une maniere furlane di fâ musiche, se e esist une identitât musicâl furlane, une discussion che o stenti a capî ma che mi sfuarci istès a puartâ indenant, dispès di bessôl o cuasi, difindint la nestre storie “pentagramade” e soredut orâl, e mancje cetant la intenzion reâl di dimostrâ, gjave cualchi preziose ecezion, la specificitât e straordenarietât dal nestri componi, dal nestri sunâ, dal nestri cjantâ. Ve ca alore che il desideri, ancje par chest an gnûf, al è propit chest: fâle sintî, o miôr, fâle scoltâ, a ducj, dentri e fûr il Friûl. ❚