La nazione Friuli: una interpretazione di parte della storia politica, culturale e ideologica del Friuli attuale (Zorç Cavallo, Adrian Cescje, Pieri Carli Begot, Sergio Salvi, CEF – Udin, 1980)
“Cheste rubriche no podeve no scomençâ cun chel che pai agns Otante al jere il libri “definitîf” su la cuistion furlane: il plui dismenteât, forsit, ma ancje il plui radicâl e clâr te sô impostazion ideologjiche nazionalitarie ma cuntun implant, di fat, marxist, coerent cu lis elaborazions che tancj ativiscj di popui minorizâts a puartavin indenant in chê ete in altris bandis de Europe e dal mont. Fat di doi volums, i autôrs a son ducj innomenâts inteletuâi engagé furlans e furlaniscj (Pieri Carli Begot, Adrian Cescje, Zorç Cavallo) che a slargjin la lôr analisi de nazion furlane (rivendicade cence esitazions tant che “nazion”, a diference di tancj furlaniscj che a vevin e a àn pôre di puartâ la cuistion furlane fin da pît) fevelant dai aspiets de storie politiche, des classis sociâls, dal lavôr, de lenghe, de leterature, de economie e de religjon di cheste nestre nazion platade, o improibide, tant che le clamave Sergio Salvi intun sô biel libri, autôr toscan che no mancje di insiorâ ancje cheste vore cuntune sô introduzion. Cun di fat, il libri al jere indreçât a un public difûr, par pandi informazions su la cause furlane, e par chest nol è in marilenghe fûr dai nons dai paîs e de premesse. Une opare, magari cussì no, aromai une vore complicade di cjatâ fûr des bibliotechis e cun dome un “sucessôr” ideâl (“Ripensare la Nazione”, Cavallo, 2016). No saressial ore di tornâ a stampâle? A saran ancje pagjinis dal 1980, ma (tal ben e tal mâl) a son riflessions ancjemò validis in dì di vuê. E, dut câs, e je une buine maniere par ricuardâur ai furlans che no son stâts dome Tessitori o Pasolini te storie dal furlanisim, ma ancje Democrazia Proletaria, il Moviment Friûl, i Cristiani per il Socialismo e tancj altris.
◆ Ma lassìn tabaiâ le premesse dal libri (grafie adatade – ndr): “Une interpretazion nazionalitarie de Cuistion furlane. Une interpretazion di part, che ben si intindi! Stant che dutis lis interpretazions a son interpretazions di part, massime cuant che a passin de descrizion di une situazion storiche a la sô valutazion, o a indicazions prescritivis su cualis che varessin di sei lis direzions di cjapâ, ancje noaltris no vin podût fâ di mancul di presentâ la nestre. No je la prime volte che o vierzìn bocje su la Cuistion Furlane, ma e je la prime volte che la posizion nazionalitarie si presente cuntune serie di riflessions che a van in tantis direzions, e dutis intun lavôr unic.”
◆ E la jentrade di Salvi: “La nuova coscienza nazionale del popolo friulano non può, del resto, essere considerata soltanto uno stato d’animo o una teoria frettolosa ed improvvisata. In questo senso, il libro può essere davvero una scoperta per il lettore e soprattutto per quegli intellettuali sedicenti organici, abituati a pascersi di luoghi comuni, di certezze statonazionali metafisiche, di riflessioni linguistico-culturali, socio-economiche e geopolitiche scaturite da una assiomatica non più utilizzabile.” ❚
