Sui euros in monede nissune scrite taliane

Di bon che sul ôr de monede al è scrit il prin viers de comedie ‘Dubravka’ dal autôr Ivan Gundulić: “O lijepa o draga o slatka slobodo” (vâl a dî: O biele o cjare o dolce libertât). O fevelìn de monede di 2 euros chi te foto, cugnade ae fin dal an passât de Bancje centrâl de Cravuazie cui monuments di une schirie di citâts storichis dal Paîs, li che dal inizi dal 2023 l’euro al è la valude uficiâl. Cheste monede e je dedicade a Pole, Pula par cravuat e Pola par talian. Sul daûr al è scrit ‘Grad Pula-Arena’ (Citât di Pole-Arene) dome par cravuat; in dut a son stadis dadis fûr 200 mil di lôr. Pecjât che Pole e sedi une citât bilengâl, li che la seconde lenghe e je il talian. E je coventade une leç nazionâl dal 2006 par definî in maniere uficiâl la aplicazion dai toponims locâi in dut il Paîs, che a àn di jessi doprâts in dutis lis ocasions. “A àn di vê fat biel a pueste, cence tignî cont de storie de Istrie” al à dit tal Parlament di Zagabrie il deputât de minorance taliane Furio Radin, che al à daurman scrit ai sorestants de Bancje centrâl par mendâ daurman cheste mancjance. A poiâ la bataie il stes sindic di Pole, Pedja Grbin, che al à marcât la necessitât di rispietâ il bilinguisim e la storie de citât.
◆ In Slovenie invezit la Cjamare di Stât e à votât nuie di mancul par meti dentri te Costituzion un articul gnûf, il 74a, che al definìs che doprâ i biliets di bancje, monedis e minûts al è un dirit par ducj. Us someial che nol sarès coventât zontâlu te Cjarte plui impuartante di un Stât? E invezit te Cjamare, 67 deputâts a àn votât a pro, dome un cuintri: pe aprovazion al coventave il ‘sì’ di almancul doi tierçs de Assemblee, jessint une modificazion de Costituzion. Isal duncje un tentatîf di blocâ il progrès tecnologjic? Cemût che a àn resonât tai ultins agns ancje i parlamentârs di Slovachie, Ongjarie e Svuizare, fâ bon un articul te Costituzion che al sigure il dirit di podê doprâ i contants cumò e tal avignî e je une maniere par podê passâ timps di crisi economiche cence scugnî metisi tes mans dome bêçs ‘virtuâi’. Cun di plui, cheste e je stade une domande di passe 56 mil citadins che za tal Novembar dal 2023 a vevin presentât ae Cjamare la lôr racuelte di firmis a pro di cheste riforme. ❚