IL FERÂL. Pai predis come «pastôrs»

Chest test al fâs part di un dai siei prins scrits, co al jere zovin plevanut a Rualp e Val. Il libri lu vin prontât par ricuardâ pre Antoni tal tierç aniversari de sô muart. Lis ideis lis veve za une vore claris tal mût di intindi la funzion dal predi in mieç dal popul, salacor mancul cultuâl, ma sigurementri plui evangjeliche. Chestis ideis a son stadis il so motor che lu àn fat cori par dute la sô vite di chê bande, ancje se la strade si faseve intrigade e dure, e se lis intemperiis de salût o dai podês e des gjerarchiis lu sfidavin e lu tormentavin. Fedêl a Diu, fedêl a se stes, fedêl al popul.
pre Roman Michelotti
Cognossi il popul
No chel de Patagonie, ma il popul furlan e cjargnel, cu lis carateristichis etnichis e di lenghe, cu lis sôs virtûs e i siei difiets. Ancje la pedagogjie e insist su la cognossince, il plui pussibil profonde, dal ambient.
Cognossi la storie, la gjeografie, la economie, la psicologjie, lis tradizions, la lenghe… O vin une «universitas studiorum» in ogni paisut. E nus covential lâ a Rome par deventâ simpri plui stupits?
Ogni paîs, ogni cjase, ogni persone la sô storie. A ognidun la sô peraule. Ma chest al è pussibil dome se si vîf cu la int dì e gnot, tal ben e tal mâl. Se si rive di corse, une messe e vie… la int e sarà foreste e nô forescj pe int.
No sin plui pastôrs, ma mercenaris, paiâts par fâ «cussì» (cf. Zn 10,5). E chi si inserìs il discors dai pulitics che a vuelin scjafoiâ la nestre gjenuinitât par pôre di rivendicazions «a la Volkspartei».
Nus pescjin in ducj i mûts par che no podìn cjapâ cussience de nestre storie dolorose e gloriose. E la glesie «uficiâl» ur da, finore, une man! E nô o riscjìn di dâ reson a la glesie e tradî il popul.
Al è il discors de lenghe, che nol è suficient, ancje se al è indispensabil. La lenghe intes glesiis, intes scuelis, intai ufizis! E je une lenghe sclete, puare e salvadie, propit come la lenghe di Crist.
No vin di vê un complès di inferioritât ni di colpe. Al è un dirit di nature e al va difindût soredut dai predis (cf. Predis cjargnei pal lôr popul, Zui, 28 di Avost 1974, letare «pastorâl»).
Un popul al sta in pîts o al cole a secontri che e sta sù o e cole la sô lenghe. La rinassite de Gjermanie e à tacât cu la traduzion de Bibie di pre Martin!
Difindi il popul
Nô o vin culture, timp e autoritât. O podìn fâ tant pe nestre int. Baste jessi unîts e no lassâsi ricatâ cun cuatri francs robâts a la puare int. Se no, cuant che al sarà masse tart, o scugnarìn ancje nô lâ a Triest, denant dal gran Sinedri e dî a chei siôrs: «O ài pecjât, tradint il sanc inocent!». E lôr a disaran: «A nô, ce nus impuartial? Rangjiti!» (Mt 27,4). Brute sentence e dople condane: dai grancj e dai piçui!
Il popul furlan o par mancjance di culture (isal colpe lui?) o par un fals spirt di rassegnazion o parcè che nissun lu difint, al tâs. Però dentri di se al desidere che nô o domandìn par lui, che lu difindìn cuintri i nemîs «laris e brigants» (Zn 10, 8) che a vegnin a fâ stragjo fra mieç la nestre int.
Il predi al à dôs armis infalibilis e i pulitics lu san benon: il Vanzeli e il popul, la vôs di Crist e dai fradis che a continuin la sô agonie inte storie. No podìn bandonâlu e dopo pratindi che nus vegni daûr. Nus vignarà, sì, ma cu la forcje!
Cirìn di fâ, cul nestri popul, une figure plui cristiane di chel nestri coleghe che al à cjatât, su la strade di Gjeric, chel puar colât tes mans dai brigants. I à dit: «Biadaç, tu starâs miôr di là… Coragjo!». E al è lât dret (cf. Lc 10,30-32).
Dulà che e je injustizie, opression, violence, il popul al à di cjatânus simpri in teste. Alore al tornarà ancje in glesie e si fidarà di nô.
Domandâ pal popul
E pratindi. O vin di jessi la vôs di chei che no àn vôs, la fuarce di chei che no ‘nd àn. Dome cussì si pues justificâ il nestri «ruolo» intal mont (cf. Pasolini).
O vin pierdude une ocasion di aur. Al jere il Spirtu Sant che nus e regalave, traviers la costance e la fede di cualchi predi judicât «scomut» (par no dî piês!). Dal 1967, 529 predis a àn domandât, intun document che al restarà inte storie de nestre glesie come esempli di tradiment dal nestri prin dovê di pastôrs, ce che la int e covave di secui intal so stomi. Pe prime volte il popul al veve i siei predis al so flanc.
Par paiâ lis nestris (di trops?!) piramidis o vin preferît tradî la int. Cumò o sin cence piramidis e cence int.
La assemblee e à di tornâ a butâ fûr un document di chel gjenar, no pulitic, ma pastorâl, dulà che si metisi decisamentri cu la int, taiant ancje la pussibilitât di tornâ indaûr. Dome cussì si salvisi.
O vin di frontâ i grancj problemis de nestre int: la emigrazion scandalose, il scjafoiaç des servitûts militârs, il sotsvilup culturâl par mancjance di scuelis cualificadis, il clientelisim dai partîts «catolics o no», l’abandon de nestre tiere de part dai nestris rapresentants, lis «cumbinis» fatis su la piel de int ecc.
Inte assemblee, il vescul cui siei predis, riunîts come apuestui, a àn di preparâ une gnove stagjon pe glesie di Aquilee.
PRE ANTONI BELINE
Gjavât di Riflessions di un predi cjargnel, pp. 50-52