TERITORIS – INTERNAZIONÂL. Mobilitazion in Frisie par difindi la autonomie provinciâl

Massime in moments di crisi economiche, là che si resone su lis spesis di taiâ, a saltin fûr progjets che a volaressin «razionalizâ» l’implant aministratîf dal stât. Propit su la fonde di cheste logjiche, diviers rapresentants politics olandês, là che il guvier al è daûr a cirî la strade miôr par cjatâ fûr altris risorsis, a àn proponût di meti man al implant dal stât cu la riduzion dal numar des provinciis che, in dì di vuê, a son dodis.
LIS IPOTESIS_ I plui cjalts ta cheste direzion a son i liberâi dal moviment Democraten 66 che a proponin la union di diviersis provinciis in maniere di formâ cuatri grandis regjons. I verts (GroenLinks), invezit, a volaressin meti sù siet provinciis cu la fusion tra diviersis aministrazions distretuâls des aghis e provinciâls. Posizions similârs si lis cjate ancje framieç di rapresentants dal partît laburist (Partij van de Arbeid) tant che la ex ministre dal interni Guusje ter Horst.
Tra lis propuestis fatis indenant si cjate ancje chê de fusion des provinciis de Frisie, di Groninghe e di Drenthe. Dal 1992 indenant, chestis trê provinciis a gjestissin dai servizis in comun, ma i guviers locâi a àn smentît che su la taule a sedin dai progjets di fusion.
LA MOBILITAZION_ Chel istès in Frisie si à inviade une mobilitazion par impedî che des peraulis si passi ai fats. In prime linie ta cheste bataie si à metût il Frysk Nasjonale Partij (Partît Nazionâl Frison) che al à presentât intal Parlament provinciâl dôs iniziativis che a àn chê di difindi la autonomie provinciâl de Frisie. Di une bande si domande un referendum popolâr là che la comunitât frisone e puedi palesâ la sô posizion sul argoment. Di chê altre, invezit, si propon une riforme che e puarti a di un aument des competencis in man ae aministrazion locâl.
Cuintri dai progjets par eliminâ la provincie si son mots ancje altris sogjets frisons, tant che il Ried fan de Fryske Beweging che su cheste cuestion al à inviât une petizion su internet alì de direzion www.foarfryslan.nl .
LIS RESONS_ Cualis sono lis resons daûr di cheste mobilitazion? La union des trê provinciis e puartarès, cemût che si à viodût in altris situazions, a centrâ la atenzion aministrative, culturâl e economiche su la aree plui fuarte e popolose che, ta chest câs, e je la citât di Groninghe. Dut câs, ce che si conteste plui a fuart al è che la Frisie e rapresente une comunitât cuntune identitât nazionâl, une culture e une lenghe divierse rispiet al rest dai Paîs Bas. La eliminazion de provincie e riscjarès, duncje, di eliminâ il status di couficialitât dal frison, di menaçâ l’implant plurilengâl dal insegnament e l’ûs de lenghe proprie intes aministrazions publichis e inte justizie. Une prospetive che e ven viodude cuntune vore di preocupazion di une buine part de comunitât frisone.
A cjapâ posizion e je stade ancje la Aleance Libare Europeane – che e met adun diviers partîts nazionaliscj e autonomiscj europeans – che e marche cemût che no sedi la prime volte che in Europe lis aministrazions centrâls a cirin di indebolî lis nazions cence stât cul provâ a colpî il lôr nivel di autoguvier.
Carli Pup