MEDITANTLIS TAL SO CÛR. Us ringracii amîs scognossûts

A son chestis lis zornadis de memorie dal taramot dal ‘76, moments li che si torne a sintî tal cûr la forade di chei dîs e di chês stagjons.
Al è vêr, e je stade une grande epopee, tragjiche e gloriose. Cuant che nô o cjalìn la Patrie dal Friûl di chei agns, i ciclostilâts dai Comitâts des tendopolis, i volantins dai paîs taramotâts, In uaite, Une puarte vierte, i scrits di Glesie Furlane… si nacuarzìn che a distance di trente e passe agns il popul furlan nol à plui vivût un moment di passion e di partecipazion, di cussience nazionâl e di condivision come chel.
E in dut chest o vin ancjemò smenteât alc: il dolôr de tiere feride, il vaî e implorâ umil e cidin des bestiis, des plantis, di ogni vivent.
Ce tant che a varan patît i arbui ingrimpâts tune tiere che si moveve, i boscs che a sintivin slacâ un ecosisteme dât dongje di secui, i crets che si cjatavin spacâts, i prâts discrotâts.
Mi contave un contadin di Glemone che tal dopo di misdì dal sîs di Mai, la gjate che e veve fat i gjatuts, ju grampà cu la bocje un a un e ju menà tal mieç dal cjamp dongje di cjase. Vevie olmât l’orcolat? E cemût savevie che chê cjase e sarès stade dirocade?
In chel teribil Unvier ’76 – ’77 tune Glemone deserte fate dome di cumui di maseriis e di trois fra i clapons, cuant che vie pe gnot e rivave une scosse, si sintivin i cjans a vuacâ. Si clamavin un l’altri e ciertis voltis a baucavin a un lamp de scosse che ti varès fat trimâ. Alore un sgrisul di pôre ti coreve pal cuarp e il cidin suturni de gnot ti menave fantasimis di terôr e di muart. Puaris bestiis forsit peadis tun cuzo, trops spavents no vêso cjapât! E i uciei, sierâts intes scjaipulis e intes volieris?
Us ringracii, amîs scognossûts. O vês contribuît ancje voaltris a la ricostruzion dal Friûl; o vês paiadis lis tassis par che lis nestris cjasis a deventassin plui bielis e no vês ricevût contribûts; vês condividût il dolôr cence forsit ricreâsi dal risultât. O vês savût stânus dongje cence pretesis e no vês domandât ricognossiments ni ricompensis. O sês stâts plui cristians di nô.
Aromai la plui part di voaltris e polse tal grim de tiere e tal sium dai juscj; e nô us sperìn cun ducj i nestris muarts a gjoldi lis gloriis dal Paradîs.
pre Tonin Cjapielâr