ATUALITÂT – Autonomie Cjargnele

«Ere ore za da un pieç di fâ provincie encje a Tumieç, come Udin Pordenon Gurizie e Triest. Ducj i bêçs dal governo fasin fadie a rivâ ca sù, vegnin glotûts jù inta palût de politiche; ducj i progjets su la mont fats a Triest nus àn insegnât che al è miôr vivi d’imprest. Il referendum lu àn fat falî metint il tet dai cincuantemil; savint benon che ca sù di nou no rivìn a cuarante mil. E intant la mê int a va, a va vie…». Cussì Lino Straulino al cjante «La Provincie di Tumieç», intal so CD «Fûr dai dincj».
DIBISUGNE DI SCOLTE_ Al è di tant timp che i Cjargnei a sintin la dibisugne di jessi scoltâts e rapresentâts dai politics, inmò di plui cumò che la Comunitât Montane e je sot Comissari. E cres la esigjence di un guvier che no si dismentei des piçulis comunitâts di mont e che al pensi al lôr disvilup e sostentament.
Cun chescj principis al è stât puartât in chescj dîs in Regjon il ‘Document di fuarcis sociâls, economichis e de societât civîl su pe riforme des autonomiis locâls e il rilanç economic sociâl de mont’, a firme de assemblee dai Cristians pe mont, Delegazion Confindustrie di Tumieç, Confartesanât, Associazion Piçule e Medie industrie, Comitât pe Autonomie e pal rilanç dal Friûl, Moviment Mont, Sindacâts (CGIL, CISL e UIL).
LIS ISTANCIS_ Il document al fevele de necessitât di cjatâ un gnûf mût di governâ la mont, midiant de sô int, tignint cont des carateristichis di chest ambient (riviodi lis funzions aministrativis dai Comuns e pensâ a un gnûf Ent che al rivi, cu la garanzie di fonts predefinîts, a produsi servizis pe mont), cooperant cui teritoris di confin (Austrie e Slovenie), e intervignint in maniere concrete inte viabilitât des zonis di mont. Obietîf primari e je ancje la conservazion dal ambient (la Regjon e â di meti precîs vincui paisagjistics e ambientâi par tutelâ il so teritori dai intervents dai grancj capitaliscj che a pensin dome al sfrutament economic). In plui, in chescj moments di crisi bisugne rilançâ la Agemont, lis cartieris, ricualificâ il setôr turistic, la rêt ospedaliere, riorganizâ i uficis postâi, lis politichis ativis sul teritori.
Dut chest si lu domande par dâ la pussibilitât a la int di mont di vê mieçs istituzionâi adeguâts par restâ a vivi la mont, cirint di bati il troi dal svilup.
MARTA VEZZI