ATUALITÂT – Mostris cence tornâ

Dieç, piçule frazion dal cjaf lûc de Cjargne, al à tes sôs mans une cjarte impuartante che e varès di tornâ a solevâ il destin dal strent e masse sfruçonât panorame turistic cjargnel. Di cinc agns in ca, in chest paisut rustic di no plui di 400 personis, un comitât coragjôs, il Comitât di Sant Florean (in onôr dal  Sant che tal 304 al è muart culì e che i è dedicade la Plêf), al propon ogni an une vitrine culturâl e religjose impuartante, cun temis diferents, imbastide cul sigjîl dai museus vaticans. Si trate di mostris di grande impuartance internazionâl, metudis adun cun amôr di int dal lûc e jentradis inte «simpatiis» de Sante Sede, che a àn puartât a visitâlis – in plui di personaçs eclesiastics e politics impuartants – ancje un «nûl continui» di int di ogni lûc. La anime di chest Comitât spontani dieçan, nassût tal 2000, a son Bons. Angelo Zanello e Don Alessio Geretti, e a chei si son svicinâts – in plui di tancj volontaris – ancje une vore di studiôs e diviersis istituzions civîls e eclesiastichis europeanis. O vin indiment il sucès, ancje mediatic, des ultimis trê mostris internazionâls – riproponudis daspò ancje in Vatican –, che tra l’altri a àn vût l’alt patrocini dal President de Republiche. Si trate di  «La Apocalìs. La ultime rivelazion» (2007), «Gjenesi. Il misteri des origjins» (2008) e  «I Vanzelis Apocrifis» (2009). Chê di chest an, a pene screade e che si podarà visitâ fin in Otubar, e à tant che teme  «Agnui. Lis musis dal invisibil» (viôt a pagjine 24).
Alore, di front di cheste ufierte spirituâl e culturâl «colossâl», cemût si metie la Cjargne, i siei abitants e lis istituzions? Ise la volontât di savê disfrutâ in tiermins economics l’aveniment? A un prin scrutini somari in lûc, al semee che la cuistion e fasi emerzi dome il status simbul dal cjargnel, distacât e frêt di front des novitâts. Il timôr riverenziâl e la gjelosie pes propriis robis a fasin spes lâ fûr di discors: «A vuelin cjolinus i nestris tesaurs custodîts intes nestris glesiis e fânt un museu», nus dîs une vecjute ingobade, a pôcs pas dal Miramonti, unic albierc in lûc. Un zovin tumiecin, impegnât ancje in politiche, al è plui realistic: «A ‘nd vin discutût ancje in consei comunâl, dulà che al è vignût fûr di une bande il grant valôr de iniziative e di chê altre il desert totâl di iniziativis colaterâls». Une conferme e ven ancje de associazion dai comerciants, dulà che si è inmò intune  situazion embrionâl di iniziativis. «E coventarès une regjie cun ducj i sogjets turistics di Cjargne e si varès di prontâ pachets par fâ restâ plui dîs che si pues i turiscj tes nestris vals, dopo che a àn visitade la mostre di Dieç».
O sin simpri li, e la colpe no je dome dai cjargnei pôc sensibii al vêr turisim, in face al bon acet osanât, ma ancje de Regjon che di agns in ca e à investît e incentivât pôc chestis validis oportunitâts turistichis che invezit al sarès ben savê disfrutâ miôr.
Dino Temil