Slovenie, cjartis di identitât bilengâls pai membris de minorance taliane e ongjarese

“Biadelore!”, al ven di dî. Dopo tant mateâ, i rapresentants des minorancis taliane e ongjarese in Slovenie a àn vinçût une lôr bataie; no sarà forsit la plui impuartante dai ultins agns, dut câs la soluzion cjatade fûr e va a pro dai lôr dirits. Te foto o podês viodi un esempli di cemût che, tacant dal 2026, a saran lis gnovis cjartis di identitât pai membris de minorance taliane che ‘ndi fasaran domande: lis scritis par sloven e par talian a varan il stes caratar cu la grandece compagne, po l’inglês in corsîf, par vie che un regolament de Union europeane al previôt l’oblic di metilu su ducj i documents personâi dai citadins de UE.
◆ Magari cussì no, fin cumò nol è stât cussì: su lis cjartis di identitât di ongjarês e talians, a figuravin simpri lis scritis tes dôs lenghis minoritariis ma no cul stes caratar e cu la stesse grandece dal sloven. Tal Avrîl dal 2022 il Guvier di Lubiane al veve cambiât la leç a rivuart cence visâ i doi parlamentârs des minorancis, tant che lis peraulis su la cjarte a vignivin prime par sloven, po par inglês e dome al tierç puest par talian o ongjarês, scrits cun caratars plui piçui (!). Daurman a son rivadis lis protestis cun cetancj intervents a nivel parlamentâr, ma dome ai prins di Setembar di chest an il ministri dai Afârs internis Boštjan Poklukar al è rivât adore a distrigâ la cuistion.
◆ Si che duncje, dal mês di Zenâr dal 2026, tai teritoris bilengâi in Slovenie a saran valits trê gjenars di cjartis di identitât: chel vieri cu lis scritis dome par sloven e par talian o ongjarês, chel in vore cumò trilengâl sloven-inglês-talian o ongjarês e in ultin chel gnûf di pache, che al rispietarà a plen i dirits des dôs minorancis.
◆ Une scuse par no fâ buine la gnove cjarte, tirade fûr plui voltis a nivel governatîf, e jere chê dai coscj une vore alts pe sostituzion di ducj chescj documents: la soluzion si è cjatade fasint cori il timp fin ae scjadince ‘naturâl’ des cjartis par po dâ fûr a man a man chês gnovis. In Slovenie la cjarte di identitât e à une validitât di trê agns pai frutins cun mancul di 3 agns, di cinc agns dai 3 ai 18, di dîs agns dai 18 ai 70, invezit dopo i 70 nol covente rinovâle. Par une gnove cjarte a coventin 20,95€ par cui che al à plui di 12 agns, 20,05€ par i fruts sot i 12. ❚