A pro o cuintri de leç pe eutanasie volontarie?

Tal referendum dai 9 di Jugn dal an passât, il ‘sì’ a pro de ‘eutanasie volontarie’ al veve vinçût cul 54,89% dai vôts; fasint doi conts, a son stâts a pro uns 379 mil di lôr, il 22,4% dal totâl dai eletôrs. O savìn che, dut câs, cui che nol va a votâ al è in erôr, si che duncje il guvier di centriçampe di Robert Golob si è sintût in dovê di fâ buine une leç di pueste dopo plui di un an dal referendum. Ve ca alore che ai 18 di Lui la Cjamare di Stât di Lubiane e à aprovât une norme sul ‘suicidi assistût’ cun 50 vôts favorevui, 34 contraris e 3 astignûts. In cheste maniere, la Slovenie e devente il prin Paîs de Europe di Soreli jevât a fâ chest pas, jentrant cussì tal grup di Stâts che a dan cheste oportunitât di finî la proprie vite in mût legâl. Tal test de leç no si dopre mai la peraule ‘eutanasie’, stant che un miedi (ancje se un pazient jal domande) nol pues fâlu murî midiant une iniezion o ben cuntune pirule par bocje. Lant daûr de gnove leç, dome i malâts che no àn sperance di cure, cun dolôrs di no rivâ plui a sopuartâju, cence malatiis mentâls e anzit dal dut lucits par podê cjapâ decisions, a podaran domandâ al miedi di meti fin ae lôr vite.
◆ Just o no? Ognidun al à la sô opinion, tant che l’ativist e politic Aleš Primc, adun cu la gjornaliste Milena Miklavčič, ai 25 di Lui devant de Cjamare te capitâl slovene a àn presentât la lôr iniziative par tirâ sù firmis in maniere di provâ a abolî cheste leç. Primc e Miklavčič si son presentâts cul cartel che o viodês te foto, fasint savê che in chel moment a vevin za 15 mil firmis. La racuelte in vie uficiâl e je tacade il prin di Setembar; stant che par domandâ di imbastî un referendum abrogatîf tal Paîs nestri vicin a bastin 40 mil firmis, l’obietîf al sarà tocjât dal sigûr dentri di pôc.
◆ Di chê altre bande, i trê partîts di guvier a vevin presentât cheste leç ai 7 di Zenâr stâts, ducj convints de sielte fate, ancje parcè che i stes miedis a puedin refudâsi di compagnâ il malât a murî traviers il suicidi assistût. Golob e il so guvier si stan intant prontant a frontâ il prossim referendum che forsit al sarà prime des elezions politichis te Vierte dal an che al ven; si sa che sot elezions cualsisei cantin al va ben par clamâ dongje vôts. ❚