Tiere, tiere, tiere ma nissun che al cjali plui par tiere

Spes o sint fevelâ int furlane de nestre tiere, di ce che e je par lôr e de sô impuartance. Pecjât che al ven fat in maniere, a voltis, plui astrate che concrete.
◆ Mi riferìs tal specific ae mancjance di cussience evidente che o ai notât simpri plui spes tal maltratament dai arbui, fat cuntune maniere di cuinçâju dal dut falade: fûr stagjon o cun machinis. Chest al favorìs il vignî dongje di patologjiis che a colonizin lis plantis e che in tancj câs si trasferissin aes lidrîs e ae tiere dongje.
◆ Une tiere malade e à bisugne di tant timp par vuarî; i rimiedis a son pôcs, drastics e in ogni câs a compuartin une pierdite.
◆ Chest al fâs dai arbui indicadôrs fondamentâi dal stât di salût de tiere, di cjalâ e studiâ cun atenzion ancje, par esempli, te stime corete dal valôr economic di un teren. Fâ inmalâ la tiere al puarte a pierdi bêçs, magari tancj bêçs, tal presint e in prospetive.
◆ Patologjiis dal gjenar a tocjin culturis come par esempli pomârs, ulîfs, pôi, noglârs, cocolârs e lis preziosis vîts.
Mi à capitât di viodi invistiments di imprenditôrs facoltôs in vignis che a pierdin il lôr valôr tal zîr di pôcs agns in maniere cuasi totâl e dut pe mancjance di une valutazion corete dal stât di salût de tiere che a stavin par comprâ.
◆ Chestis malatiis a son une plaie no dome pai imprenditôrs che a invistissin in agriculture pontant a valorizâ lis nestris ecelencis come il vin, ma a son ancje un probleme di gjestion dal vert public.
◆ Cuant che tes nestris citâts e intai nestris paîs al cole un arbul, la colpe i ven dade al aiar masse fuart. Te plui part dai câs, invezit, la cause e je des lidrîs fraidis di chei arbui che si son inmalâts par colpe dal om che al è intervignût cuinçant il fueam o fasint sgjâfs che a àn cjapât dentri lis lidrîs tal moment e tal mût sbaliât. In cheste maniere, si à causât in maniere direte l’inmalâsi de plante, che dopo cualchi an e cole deperide di une malatie che e lavore sot tiere e che, par difûr, e met in evidence, almancul in aparence, pôcs segnâi.
I nestris vecjos, puars e contadins, a cjalavin simpri par tiere, ma nô o sin bulos e i bulos no cjalin mai par tiere! ❚