Lis microplastichis, fruçons invisibii che si cjatin pardut e che a intossein vie pai secui

Lis microplastichis e son particulis di plastiche plui piçulis di 5 milimetris (mancul di un gran di sâl) e insolubilis inte aghe. A pet de lôr dimension, l’impat che a àn sul ambient e su la salût umane al è une vore grant. Si presentin come un dai problemis ambientâi plui intrigôs e complicâts.
◆ Chestis particulis, simpri plui piçulis e dificilis di gjavâ vie dal ambient li che a restin par centenârs di agns, a rivin dai procès di decomposizion chimiche, fisiche e mecaniche des plastichis par vie di agjents atmosferics, sfreolaments, abrasions e erosions.
◆ Daûr de lôr origjin, lis microplastichis a son classificadis come primaris e secondaris.
Chês secondaris si formin dai fruçons di materiâi plastics plui grancj. Une butilie bandonade su la splaze si disfe fin a deventâ invisibile, ma no sparìs mai dal dut.
I tiessûts sintetics (nylon, poliestar e vie indenant) a dan fûr microparticulis che a rivin tai flums e tal mâr midiant des aghis di scaric. Te sô vite, un pneumatic al lasse grams di microparticulis sul asfalt e i ploiams lis mandin te fognadure.
◆ Chês primaris a son invezit zontadis ai prodots in forme di microglobui che a puedin vê carateristichis diferentis: jessi abrasîfs, dâ cremositât (texture par inglês) o ancje mantignî il stât di agregazion. Tal setôr de igjiene personâl, si cjatin tai cosmetics che si resentin cu la aghe come i disfueants (scrub par inglês), cualchi gjenar di savon, dentifricis par sblancjâ i dincj, shampoos e balsims par rindi lusints i cjavei. Ma ancje sbelets, cremis pe piel e deodorants. Tai setôrs agricul, de pulizie e de manutenzion o cjatìn fintremai detergjents, pesticidis, vernîs, pituris e fertilizants.
◆ Une diretive europeane, jentrade in vore ae fin dal 2023, e à fermât la zonte di polimars sintetics tes misturis. Dut câs, calcolant i timps luncs di transizion dâts aes impresis di produzion par conformâsi, e vâl la pene dâ un cuc al sît www.reach.gov.it par cognossi cui che a son.
◆ Par altri, e cence bisugne di une lauree, o podìn scomençâ a lei lis etichetis par cirî almancul cualchidun dai acronims des microplastichis plui dopradis (a comencin ducj cul “P”) e stratignîsi di comprâlis: PE (polietilen), PMMA (metacrilât di polimetil), PET (tereftalât di polietilen), PP (polipropilen).
◆ La plastiche e je stade un materiâl rivoluzionari intai ultins 70 agns. E ven doprade une vore pal fat che si conserve a dilunc, e je lizere, flessibile e fuarte. Il probleme vêr nol è tant chel de plastiche in se, ma pluitost chel dal so ricicli e smaltiment.
Jessint no biodegradabile, tant che il len o la cjarte, si romp in fruçons simpri plui piçui che, sparniçâts tal ambient, a durin secui.
◆ Lis microplastichis a son stadis cjatadis dapardut: tai mârs, sui glaçârs, inte tiere agricule, tal aiar che o respirìn e ancje, e soredut, dentri dai fabricâts.
A jentrin te cjadene alimentâr dai organisims vivents. Tal mâr, par esempli, i moluscs ju glotin cul mangjâ e i pes lis confondin cul plancton.
Un altri risi al ven dal fat che a puedin puartâ ator sostancis tossichis come i incuinants e i metai pesants, deventant cussì vetôrs pe contaminazion.
◆ I efiets su la salût umane a son daûr a jessi studiâts, sedi pes consecuencis sul sisteme imunitari e endocrin sedi pes inflamazions cronichis.
◆ Te produzion e smaltiment des plastichis, la ricercje e je orientade su soluzions gnovis. Si metin adun materiâi gnûfs, ecologjics e biodegradabii e altris derivâts dal ricicli di materiis inorganichis.
Che si tegni cont che dal an passât (2024) une aziende taliane e fâs cressi foncs su pressât di len o materiâi diferents, ma simpri ecosostignibii, par produsint un gnûf che al sostituissi il polistirûl dai imbalaçs (v. “Scientific American” – Avost dal 2025).
◆ O sin ben cussients che in dì di vuê lis microplastichis no si puedin evitâ dal dut. O podìn però meti in vore avertencis par ridusi la lôr cuantitât.
In zonte di chel che o vin bielzà capît, provìn a sfuarçâsi di plui, massime te vite di ogni dì. Tornìn a doprà breis di len, no stin plui a netâ cun sponzis e stofis fatis cun microfibris o sborfins di plastiche. Sielzìn alternativis a pignatis e fersoriis cul rivistiment antiaderent. Metìn te laveblancjarie un filtri che al draze lis microplastichis.Smaltìn la plastiche in maniere juste, come ancje lis peliculis e i imbalaçs; cjapìnle sù cuant che le viodìn semenade dulintor tal ambient.
◆ Vê cussience di ce che si fâs al è il prin pas bande il cambiament. ❚