CULTURE – ART-Â. Tal cûr dal domo di Udin la memorie dal Patriarcjât di Aquilee

Si viôt simpri plui spes tes placis, li che si difint il lavôr e i lavoradôrs furlans, li che si difint la integritât dal teritori dal Friûl. E, di resint, e svintulave ancje sul Zoncolan al passaç dal Zîr d’Italie. Ma di dulà rivie la bandiere dal Friûl, chê cu la acuile zale sul font blu, deventade simbul de identitât furlane? E je la insegne dal Patriarcjât di Aquilee. Cui che al à voie di viodi la version origjinâl al à di lâ tal Museu dal domo di Udin, dedicât a Bertrant di Saint Geniès, il patriarcje che al segnà la storie de Glesie di Aquilee e che al de vivôr ae vite culturâl e economiche dal teritori. Alì a son conservâts ancje i siei paraments, chei di dulà che e rive la bandiere dal Friûl.
Tes capelis, dal Tresinte, di Sant Nicolau, dal Cuarp dal Signôr e tal batisteri, ven a stâi il nucli plui antîc dal domo, li che al è disponût il museu, e je la memorie de storie, de culture e de art dal patriarcjât di Aquilee ai timps di Bertrant.
Te prime capele a son lis pituris a fresc di Vitale di Bologne, dal 1348/’49, che a inzornarin la piture furlane e chê des regjons dongje. Te seconde a son trê temparis su taule dal decim cuart secul su la vite e la muart dal beât Bertrant. Di marcâ, tal batisteri, la biele arcje di marmul. Comissionât dal patriarcje Bertrant tal 1348 pe basiliche di Aquilee par acolzi lis relicuiis dai sants Ermacure e Fortunât, il sarcofac al fo po puartât tal domo di Udin par tignî il cuarp dal patriarcje, copât di nobii locâi tal 1350. Al è tignût sù di cinc statuis. Cuatri a varessin di rapresentâ lis vergjinis santis di Aquilee: Erasme, Tecle, Dorotee e Eufemie. Tal mieç, Sant Valentinian.
Il sepulcri al tignive ancje i cimelis di Bertrant, il furniment funerari dal beât, cumò tes vetrinis: paraments liturgjics e insegnis, tant che il cjamesot di lin cu la bandiere di sede cu la acuile sul font blu, ripuartade ancje tal vessil e tai cjalçârs, la planete di vilût cremis e la tele funerarie ricamade di lin.
A insiorin la mostre i ogjets di oresinarie sacre e profane fats tra il decim cuart e il decim setim secul, pe plui part risultât dal cult dal beât daspò de sô muart. Di segnalâ la crôs-spile di Sante Elisabete di Ongjarie, donade dal imperadôr Carli IV di Lussemburc.
Il museu si pues visitâ dal lunis ae sabide des 10 di matine a misdì e des 4 daspomisdì aes 6 sore sere, la domenie e i festîfs des 4 daspomisdì aes 6 sore sere. La jentrade e je libare. Informazions al numar 0432/506830.
Erika Adami