Corte di Lunas: un viaç sonôr tra lidrîs e desideris

Tal an che lis lunis plenis a somein di fevelâ cun vôs incjantade, o scuvierzìn un grup che di cheste magjie al à fat lenghe: Corte di Lunas. Cun plui di dîs agns di ativitât, Corte di Lunas al à metût dongje une alchimie sonore che e je un miscliç di folk e rock, corâi polifonics, influencis medievâls e metal, dut cence mai fâi mancjâ un toc di teatralitât che e fâs di ogni esibizion un viaç naratîf. Tes lôr esibizions dal vîf, il public al ven puartât in paisaçs sonôrs mistics, framieç di baladis intimis e danzis salvadiis, là che il confin tra realtât e fantasie si fâs sfumât.
◆ Il grup di Çarvignan nus conte cussì di storiis, emozions e lidrîs cul gnûf album Nemeya, publicât ai 20 di Març (ecuinozi de Vierte) di chest an. Prin di chest, al è jessût come singul un dai tocs plui significatîfs dal gnûf album, ancje parcè che al è scrit par furlan: Il Desideri di Là. Un imni ae aventure e a ae scuvierte di se stes.
◆ Il Desideri di Là al incjarne in maniere perfete la poetiche de lôr musiche: melodiis ipnotichis di ghironde e flauts si metin adun cuntune ritmiche pressante, intant che la vôs e mene il scoltadôr intun percors di cressite e trasformazion come lis fasis de lune. «No je aventure cence ostacui, no je magjie cence pericui» nus conte il grup, che cun chest toc al vûl clamâ il scoltadôr a cjalâ dentri di se, a scoltâ ognidun lis nestris pôris par cjatâ ce che nus fâs bati il cûr pardabon.
◆ La sielte di doprâ il furlan in cuatri dai cutuardis tocs che a componin l’album, no je scontade. La lenghe furlane e je protagoniste, no come ornament, ma come veicul di significâts profonts e memorie condividude. Une sielte di doprâ la marilenghe che no je dome artistiche, ma di fonde identitarie.
◆ I Corte di Lunas a valorizin il furlan puartant il toc in tancj concierts internazionâi. Si son esibîts tai festivai celtics e fantasy europeans plui impuartants, come Montelago, Triskell, Druidia, Folkest, Hobbiton, e in plui a partecipin a events come il Lucca Comics & Games, Rimini Comix e Sofar Sounds.
◆ Il lôr album di prin, Tales from the Brave Lands (2020), al jere za un omaç ae tradizion furlane, rivisitade cuntune sensibilitât contemporanie, che à concuistât il public e la critiche, cun plui di 200.000 scoltis su Spotify. Al baste pensâ che tra i tocs di chest album si scoltin cjançons come The castle of Gemona, Scjaraçule maraçule e Orcolat. Cul singul Dance of Shadow and Light e Shine (2022), il grup al à tacât un viaç plui interiôr, che si svilupe ad implen in Nemeya.
◆ Il gnûf album al è une opare corâl che e va a scuvierzi simbui e archetips de anime umane, restant simpri leât aes lidrîs. Il toc Il Desideri di Là, cul so slanç e cul so messaç, al rapresente une sintesi perfete di cheste vision: une clamade al coraç, ae memorie e ae bielece di une lenghe che e sa ancjemò fâ insumiâ.
Intun timp dulà che dispès si dismentein lis storiis antighis, Corte di Lunas nus es ricuarde cun fuarce e gracie, mostrant che la musiche, cuant che e je sincire, e pues vierzi portâi tra monts.
◆ Chest grup mistic si compon di artiscj di talent e poliedrics: Giordana Gismano (vôs soliste e percussions), Martina Fabris (ghironde (hurdy-gurdy) e corâi), Maria Teresa Vivianetti (flauts e corâi), David Bressani (bouzouki e corâi), Nicolas Nicoletti (ghitare acustiche e eletriche e corâi), Massimo Girardi (bas eletric), Riccardo Olivo (baterie e percussions).
◆ Par savê di plui sul lis lôr musichis e i lôr tancj progjets, visitait il sît www.cortedilunas.com o lait su Instagram, Facebook e YouTube. L’album Nemeya al è disponibil su dutis lis plateformis digjitâls e su Bandcamp. I prossims apontaments dal vîf a vignaran publicâts sui lôr canâi uficiâi: une ocasion par lassâsi traspuartâ tal lôr mont incjantât. ❚