Cirît di meti la machine intal puest just!

Aromai al è deventât un stamp di business cetant betât: si ferme la machine ancje dome par un moment devant di une pompe di benzine bandonade o di un fabricât vueit e invidrignît, là che par altri no son cartei cu la scrite “fermade improibide”. Daspò di cualchi setemane al rive l’avîs di une denunzie par violazion di proprietât, cu la pretese di paiâ cualchi centenâr di euros. Cui che nol paie al riscje un procès: al è un afaron, fondât su la pôre, e cualchidun al à pensât di meti sù un sisteme creatîf par scuedi bêçs facil.
◆ Un di chescj bolpats al à bielzà pierdût cetancj procès devant de Cort Sovrane, che e à declarât che cheste pratiche pal fin di vuadagn no je acetabile intal câs di violazion di proprietât.
◆ Dome a Viene, jenfri il 2013 e il 2023, il numar di denunziis su chest spieli al è incressût dal 75%, di 1657 a 2869, e la plui part di chestis e inten violazions par parcaments. Chestis denunziis a tirin dentri dut câs ancje tancj avocats che a sapontin citadins che no àn plui pôre dai procès.
◆ Za fa un mês la associazion dai consumadôrs e à otignût une vitorie impuartante cuintri di une imprese cognossude metude sù par scuedi i parcaments a Viene. Tant che al è scrit sui ats, chest model lucratîf al podarès dut câs lâ indevant, ancje midiant di ditis forestis. Dôs aziendis polachis cun stanzie a Poznań a àn mandât menacis di denunzie par soste improibide intal Distret 22 di Viene. Chestis à an un lôr domicili in Austrie, ca di une ex aziende locâl di afit di parcaments, che intai trê agns indaûr e à vût cuerelât cetancj di lôr par soste improibide e cui prins dal 2025 e je stade licuidade. La domande di regulis legâls che a tegnin in brene chestis pratichis si fâs sintî simpri plui a fuart. Il guvier al vûl cjatâ soluzions praticabilis e a son stadis presentadis ancje propuestis. Une idee e sarès chê di palesâ aes aziendis acusadoris un risi finanziari. In chel câs – ven a stâi chel di denunziis par violazion di proprietât – bisugnarès permeti ai tribunâi di contizâ a chestis aziendis i coscj processuâi par 700-900 euros sù par jù, cemût che al vadi il procès. Une altre propueste e je chê che no si podedi plui punî câs tant che passâ intun parcament par zirâ, zirucâ o fermâsi par un moment cence bandonâ il mieç.
◆ Al fâs câs che inmò une volte la Austrie, cuintri di compuartaments mafiôs cussì clârs, e mostredi tante ingjenuitât intal frontâju, proferint soluzions che a son cuasi ridiculis e dal dut debilis par disvidrignî chel che si sta palesant tant che un racket rût. ❚