La vite di Peter e Matteo Stefanutti
jenfri stale e latarie
La passion pai animâi dai fradis Peter e Matteo Stefanutti di Dimplan e je scomençade in cjase: “O vevin une stalute di dîs vacjis” – al conte Peter. “Dopo lis scuelis superiôrs di perît agrari, o vin fat un periodi sot paron ma, a pene che o podevin, o lavin te stale che e puartave indevant mê mari. Dopo o sin lâts a Sudri in afit intune stale de Comunitât Montane e intant o vin lassât il lavôr par dedicâsi a timp plen a cheste ativitât. Tal 2018 o ai savût che e jere in vendite une stale a Dentramp e o soi rivât a comprâle “clâfs in man” cun mûrs e animâi dentri. Gno fradi al sta daûr ae stale di Sudri, là che il lat al ven puartât te latarie, e jo o soi a Dentramp dulà che o trasformi di bessôl il lat e o ai un piçul spaç che al è viert dôs voltis pe setemane, di vinars e di sabide. Di cinc agns o cjamìn malghe Meledis; o vin 2 dipendents. Nô o fasìn i lavôrs plui grues: gno fradi al va sù ogni dì par viodi se al è alc ce comedâ, jo o voi a menâ sù i animâi e une volte pe setemane se al covente alc.
◆ O fâs soredut formadi, scuete, strachin, formadielis; no mi reste nuie e no rivi a fâ robe stagjonade. O cîr di stâ tal tradizionâl ancje parcè che cumò no ai timp par stâ daûr di plui; o vin tacât i lavôrs te stale di Dentramp e il cantîr al previôt la ristruturazion di un capanon di 90 metris par 12. Al deventarà une stale il plui pussibil automatizade, cussì cu la molzidure eletriche, par esempli, o rivarai a vuadagnâ timp par lâ indevant cul rest dai lavôrs. Cemût che le viôt jo: l’automatisim pai animâi al è un pas indevant di no pôc cont e cu la molzidure eletriche si torne a une sorte di autogjestion, puartant in miôr la lôr cualitât di vite.
◆ Cumò o vin une cincuantine di animâi che a son a Sudri. Par une cuistion di spazi no podìn vênt di plui. Jo o pensi a molzi e gno fradi al viôt dal fen e ur da di mangjâ ai vidiei; lis vacjis di molzi a son 35 e mi coventin sù par jù 2 oris e un cuart.”
◆ Cuant che si domande a Peter cemût che e je la sô zornade, al rispuint: “Jo o soi tardîf, o jevi tor 7 e i finis aes 11 di gnot, al dipent de zornade… doman di buinore aes 5.30 o soi a cjamâ fen tal prât e dopo o voi te stale, o fâs il formadi, o torni tal prât e po inmò te stale… disìn une vite un pôc cussì. No sai se e je une passion o une malatie. Jo, usât a chest stîl di vite, no cambiarès mai parcè che o larès sigûr in depression. O voi par 39 agns; o ai tacât a lavorâ tal bosc che o vevi di finî 16 agns e dopo no je stade une fin. Il biel di fâ l’agricultôr al è che tu sâs di tacâ une zornade ma no di finîle. Par me il moment plui biel de zornade al è cuant che o voi a molzi i miei animâi, al è il moment là che o ai plui pâs. I animâi cuant che tu ur âs dât di mangjâ e tu ur âs fat une caisse, come che ti cjalin, ti ripain di dut.
◆ O scuen dî che no soi masse puartât par stâ cu la int, soredut cuant che cualchidun al fâs di dut par fâti inrabiâ; ogni tant a ‘nd è zornadis che cualchidun tes gjave di bocje. Se o ai di cjatâ di dî par un chilo di formadi, mi cjapi e o voi cul gno tratôr a fâ alc altri. Ducj a pensin che tu sedis alì par spietâju lôr, ma nol è propit cussì.”
◆ Un altri aspiet negatîf al è che “tai ultins timp a son pôcs segnâi di atenzion pal nestri setôr. In cualchi riunion tai Comuns al è stât specificât, di bande mê ma ancje dai miei coleghis, che no jerin li par bati bêçs, ma par domandâ che nus lassin lavorâ e che nus cjatin fûr tiere di lavorâ. Il frazionament dai terens par nô al è une rogne grande. Spes si scuintrìn cun mentalitâts antigonis e che no nus permetin di seâ dut ce che al è a puartade di man. Cierte int pluitost di vê il prât net, par pôre che i rompìn l’arbul che i tocjìn i confins, no nus permet di taiâ la jerbe. In Trentin Sudtirôl il prât al è prât, nol è confin che al ferme il lavôr dai agricultôrs.”
◆ Peter “nol è social”, nol fâs nissune publicitât e si ative ae vecje maniere cul “passe peraule”. In conclusion al confide: “Jo no rivi a imagjinâmi une vite diferente: e je la mê maniere di vivi. Jo o ai fat il boscadôr ma o vevi ancje lis vacjis che mi impegnavin tal dopolavôr. Cuant che o ai vût la fortune di lâ in feriis un pôcs di dîs, aes 5 di sere mi tacave l’aviliment, o jeri une ruie e mi domandavi “Cumò ce fasio?” O soi usât a vê cierts oraris e a organizâ la mê zornade. I miei animâi a fasin part de mê famee.” ❚
