La Vierte, une stagjon che no vûl murî

A diference dal Invier, che al è daûr a disparî tant che stagjon cun temperaduris mediis negativis e nêf in planure, la Vierte e resistarà al cambiament climatic. O ben, par dîle intune maniere televisive, e sarà “resiliente” al cambiament climatic: i siei aspiets distintîfs si podaran cjatâ ancjemò un doman, ma ritmis e timps a saran diferents.
◆ Ce che al caraterize la Primevere e je la transizion di une stagjon plui frede a une stagjon plui cjalde, causionade de incressite des oris di lûs e di un soreli a man a man plui alt intal cîl (che al vûl dî che i rais a rivin plui perpendicolârs ae tiere e a scjaldin in maniere plui eficace). Cheste transizion e continue e e continuarà a sucedi. Ce che al mude però a son la partence e il travuart: Invier e Istât a saran plui cjalts di chei che o cognossevin, e duncje e sarà cussì ancje la Primevere in sens astronomic, ven a stâi la dade di timp jenfri i 21 di Març e i 21 di Jugn. Dut câs, lis temperaduris che par nô a jerin aviertanis a continuaran a esisti, ma anticipadis. 
◆ Duncje, o varìn une “Vierte di lûs” che e larà indenant a colâ jenfri Març e Jugn e une “Vierte di temperadure” che invezit e colarà jenfri Fevrâr e Mai, o fintremai ancjemò plui adore. Come che e à vût scrit la divulgadore sientifiche Sara Peach, al è come se i struments di un toc polifonic a sunassin ben lis lôr parts ma intai moments sbaliâts: salacor si rivarès ancjemò a intindi ce toc che a sunin, ma no rivaressin plui a gjoldi la musiche. O podìn ben capî, alore, che chest discubiament des dôs Viertis nol è dome une curiositât anedotiche, ma al à consecuencis pratichis dramatichis, massime intai cjamps ecologjic e agricul. Cun di fat, ciertis plantis e animâi si dismovin dal Invier cuant che a tachin a sintî temperaduris plui cjaldis, al è par esempli il câs dai pestelacs e des âfs. Altris plantis, come il vuardi, a sflorissin invezit daûr dal cressi de lûs. Ancje cierts animâi migradôrs si movin cul mudâ de lûs. Duncje, lis plantis che a sflorissin masse adore rispiet ai impolinadôrs a puedin lâ a pericul di no riprodusisi; par cuintri, lis âfs a puedin vê problemis a cjatâ rosis par fâ la mîl (o ricuardìn ancje che cheste no je la uniche menace pes âfs, ore presint sot atac ancje de bande di parasits). Se rosis e menadis a vegnin fûr masse adore inte stagjon, a puedin jessi plui esponudis al pericul des criùris, che a puedin verificâsi simpri ancje intun clime plui cjalt (chest aspiet al è stât indagât intal Studio conoscitivo dei cambiamenti climatici e di alcuni loro impatti in Friuli-Venezia Giulia dal 2018).
◆ Ancje pe Vierte, duncje, al vâl il principi dal adatament al cambiament climatic. In chest câs, o podìn ancje dâ une man, salacor vênt la gracie di lassâ cualchi rose intal nestri prât cuant che o taìn la jerbe, pe gjonde des âfs. ❚