‘Carniafornia Dreamin’: un viaç tra Cjargne e Californie

Dopo une serie di colaborazions che a tachin tal 2018, Doro Gjat e Dee Jay Park a tornin cuntun progjet che al met in lûs lis lôr lidrîs – un cjargnel e chel altri triestin – e influencis. Il gnûf album Biancoscuro, publicât ai 4 di Avrîl pe etichete La Grande Onda, al è une declarazion di amôr ae musiche e ai ritmis de West Coast dai agns ’90 e 2000, ma cuntune anime dal dut cjargnele.​
◆ Il disc al ten dongje cuatri tocs. Si vierç cun Carniafornia, un titul che al fâs dal toc un incuintri tra i monts de Cjargne e lis palmis de Californie. I boscs furlans a scomencin a balâ suntun beat che al sa di Los Angeles. Doro al cjate il so spazi tra lis stradis di Tumieç e lis boulevards californianis, intant che Dee Jay Park al met in musiche un vibe che al ricuarde il g-funk di Snoop Dogg e Dr. Dre.
◆ Il secont toc, Sottoeffetto, al viôt la partecipazion di Tormento, artist tornât in prin plan cun la sô partecipazion a Sanremo 2025. Il toc al è un viaç tra ricuarts e ispirazions, un omaç ai agns di formazion di Doro e al so leam cu la musiche di Tormento. Une liriche che e fâs tornâ a vivi i timps passâts, cuntune cjançon malinconiche. Une colaborazion che e à il profum di nostalgjie e che e je un viaç tra i ricuarts e lis ispirazions, un omaç a une gjenerazion che e à cjatât la sô identitât te musiche.​
◆ Mularie sporcje, che si pues interpretâ come “Bad Boys” par furlan, al è un mix intrigant di lirichis par talian e furlan. Un esempli di cemût che Doro al rive a meti insiemi lis diviersis lenghis par contâ storiis universâls. La cjançon Nei 90, invezit, e je un storytelling che al passe sui moments clâf de culture hip hop in Italie, cun citazions che a fasin tornâ tal cjâf i ricuarts di chei agns.
◆ Dee Jay Park al mostre une grande capacitât di spaziâ tra diviersis epochis sonoris. Dai sounds g-funk ai ritmis ratchet, ogni linie e je une sperimentazion che e met in lûs la sô abilitât di produtôr. La sô esperience cun albums come The Dustronomist e Miscellanea Beats (2024) si fâs sintî in ogni batude.
◆ Biancoscuro nol è dome un EP, ma une declarazion di identitât, un progjet dulà che Doro Gjat al continue il so percors di valorizazion de culture furlane, cussì come che al à fat cun albums come Vai fradi e Orizzonti verticali. La sô capacitât di meti insiemi lenghis e sonoritâts diviersis nus mostre un artist che al è in evoluzion continue. L’album stes al è sinonim de maturitât artistiche di Doro Gjat e Dee Jay Park, un puint tra la Cjargne e la Californie, tra il passât e il presint, tra il Friûl e il mont.​
◆ Par chei che a cognossin za Doro Gjat, Biancoscuro al è une conferme de sô maturitât artistiche. Par chei che ancjemò no lu cognossin, al è il moment just par scuvierzi un artist che al rive a meti insiemi tradizion e modernitât, furlan e hip hop, monts e palmis.
◆ E se chest EP al è «dome une sbandade» come che al dîs Doro, une sorte di «aperitîf musicâl» prime di un prin plat che si preanunzie plen di gust e sostance, al è parcè che chest di Doro Gjat nol è un travuart, ma un passâ vie plui inlà, une tape suntune strade che e continue a puartâ la sô musiche pal Friûl e ancje là dulà che il Friûl nol è ancjemò rivât.
◆ Lait a scuvierzi Biancoscuro, scoltait ogni toc cun atenzion par cjatâ lis sfumaduris tra i bas e i profums di resine, e sintît cemût che il furlan si pues meti in rime suntun beat di Venice Beach: https://linktr.ee/dorogjat
◆ La musiche no à frontieris, e cun Doro Gjat, si sa, la Cjargne e je come une West Coast cul cjâf pal mont e il cûr a cjase. ❚