Al rive il dizionari biografic dai istrians, di plante fûr in dôs lenghis

O soi sigûr che tancj dai nestris letôrs a vedin in cjase il cussì clamât “Nuovo Liruti”, ven a stâi il Dizionari biografic dai furlans, o ben che i vedin dât almancul une passade in biblioteche par cjatâ fûr informazions suntun personaç de nestre storie (o ancje che a vedin sgarfât su la direzion www.dizionariobiograficodeifriulani.it). Stant che ogni regjon, storiche o politiche, e à dirit di vê un volum cu la liste de int plui innomenade che vie pai secui si è dade di fâ a pro dal so teritori e de sô int, ve ca che di pôc al è stât presentât a Pole il Dizionari biografic istrian, burît fûr par cure de Regjon de Istrie, che e à tirât fûr i bêçs par cheste iniziative. Il volum al à 1.032 pagjinis, li che si conte di 2.262 di lôr, tacant dal secont secul p.d.C. fintremai ae fin dal 2023. Un dai prins nons al è chel dal re de Istrie, Epulon, che tal 177 p.d.C. si copà cu la sô spade dopo vê capît che il so popul al stave pierdint la vuere cuintri dai Romans invasôrs.
◆ Une cjosse e à di jessi marcade daurman: chest Dizionari al è di plante fûr bilengâl, vâl a dî par cravuat e par talian. Cun di plui, ancje se dât fûr di une regjon de Cravuazie, la opare e cjape dentri ancje int nassude in dute la Istrie, tacant di Mugle, po traviersant i cuatri Comuns bilengâi su la cueste slovene (Ancaran, Cjaudistrie, Isule e Piran), par po tignî cont di dute la penisule fin cuasi a Flum. Si scuen fâi i compliments a cui che al à progjetât cheste vore par vê viodût sin dal imprin la Istrie tant che regjon storiche uniche, cence fâ câs de division ‘no naturâl’ causionade di cetancj fats storics che le àn puartade a deventâ part in dì di vuê di trê (!) Stâts diviers.
◆ Pardabon tante int e je stade clamade adun pe redazion dal Dizionari biografic dai istrians, che al à domandât 5 agns di lavôr cu la colaborazion di uns 200 tra docents, studiôs e apassionâts. Il lavôr al è stât coordenât dal professôr Robert Matijaši´c, che al à ricuardât che chest Dizionari al rive dopo vincj agns de publicazion de Enciclopedie istriane. Dentri, si capìs, a figurin ancje membris de minorance taliane de Istrie, che po a àn vût sucès te vite tant che, par esempli, Fulvio Tomizza e Sergio Endrigo. ❚