Che al sedi “RearmEU” o che al vedi non “Readyness”

Jean Monnet al è stât un politic e economist francês, che al à vût un rûl une vore impuartant intal inviament dal procès istituzionâl di integrazion europeane, massime tant che colaboradôr dal ministri pai afârs forescj, Robert Schuman, e po tant che prin president de Alte Autoritât de Comunitât Europeane dal Cjarbon e dal Açâl (CECA). Daûr di une des sôs frasis plui cognossudis, lis situazions di crisi de Europe a puedin deventâ ocasions par sburtâ indenant il procès di integrazion continentâl, simpri però che si cjatin «lis soluzions justis par frontâlis».
◆ Stant che in gjenerâl la Europe e in particolâr la Union Europeane (UE) si cjatin za di timp intune cundizion di chê fate, plui di cualchidun al à tornât a tirâ fûr chê riflession, par esempli in cont di un dai cjamps dulà che la UE dal dì di vuê e mostre ducj i siei limits: la sô politiche di difese e di relazions cul rest dal mont.
◆ La cuistion si à palesade ad in plen cu la invasion de Ucraine de bande de Russie e cul conflit militâr che al è ancjemò in vore dai 24 di Fevrâr dal 2022. Cundut che tra i doi stâts ex sovietics lis tensions a esistin ancjemò di prime – salacor za tacant de fin de esistence de URSS, tal 1991, e par sigûr almancul dal 2014 – a son stâts propit i siei disvilups plui resints, dongje di chei di altris cuistions internazionâls tant che chê che tocje Israêl e Palestine, a mostrâ che la UE si cjate intune cundizion di debilece. Lu àn confermât ancje la vitorie tes elezions presidenziâls americanis di Donald Trump e l’inviament de sô politiche che in ducj i sens e je antieuropeane a clâr. Ma lu conferme ancje la iniziative cjapade sù, juste par frontâ cheste situazion, de bande de Comission Europeane (CE) vuidade di Ursula Von der Leyen, in principi batiade “RearmEU” e dopo tornade a clamâ “Readyness 2030”.
◆ Cun di fat, chel fat indenant di Brussel vie pal mês di Març stât, cu la poie di une risoluzion fate buine de maiorance dal Parlament European, ma ancje contestade cun determinazion di diviers di lôr, nol è par sigûr un progjet di difese europeane, parcè che al ponte dome a sburtâ i Stâts a incressi la spese in armaments cence proviodi une azion politiche concrete de UE e duncje cence mudâ – e cence comedâ – une situazion che al sarès stât ben metii man ancjemò ae fin de Vuere frede.
◆ Par fâlu pardabon e coventarès une riforme dai Tratâts che a son in vore, che e metès la UE tes cundizions di vê une politiche di difese e di relazions cul rest dal mont che e sedi pardabon sô e no insuazade in chê dimension intergovernative, là che e va dilunc a cjatâsi. Par provâ a fâ almancul alc, cence tocjâ i Tratâts e intune suaze intergovernative, là che però si met adun une colaborazion plui strente e di cooperazion struturade dome jenfri chei Stâts membris che a àn chel intindiment, si podarès lâ daûr des previsions dai articui dal 28 A al 28 E inzornâts cul Tratât di Lisbone. Cundut achel dentri dal “Libri blanc” no si cjate nancje cheste pussibilitât.
◆ Par chel a àn fat ben i eurodeputâts – par esempli la galiziane Ana Miranda (Bloque Nacionalista Galego – BNG) e la catalane Diana Riba (Esquerra Republicana de Catalunya – ERC) dal grup Verts/Aleance Libare Europeane e il basc Perrando Barrena Arza di EH Bildu, dal grup de Çampe europeane – che a àn votât cuintri de risoluzion presentade a Strasburc.
◆ Chel de Comission al somee plui une sorte di “Grey Deal” (un plan a pro dal disvilup de industrie beliche) che un plan di politiche comune di difese: nol infuartìs il profîl de UE, al incrès i nazionalisims dominants (bielzà ipertrofics) e nol rive nancje a vê un impat diret e svelt sul conflit rus ucrain.
◆ Par tornâ aes peraulis di Jean Monnet, la soluzion fate indenant no somee jessi chê juste e la crisi de Europe e reste chê o ben, magari cussì no, e riscje fintremai di lâ ancjemò in piês. Sperìn che nol sedi propit cussì… ❚